ஒரே நாடு ஒரே தேர்தல் ! முதல்வர் மு.க.ஸ்டாலின் கடும் கண்டனம் !
மு.க.ஸ்டாலின்
ஒரே நாடு ஒரே தேர்தல் சட்ட முன்வடிவிற்கு ஒன்றிய அமைச்சரவை நேற்று ஒப்புதல் அளித்துள்ளது. அடுத்த வாரம் நாடாளுமன்றக் கூட்டத்தில் இந்த சட்ட முன்வடிவு அறிமுகப்படுத்தலாம் என்று எதிர்பார்க்கப்படுகிறது.
இந்நிலையில் இந்த சட்ட முன்வடிவிற்கு கழகத் தலைவர் முதல்வர் மு.க.ஸ்டாலின் அவர்கள் தமது கடும் எதிர்ப்பை தெரிவித்து சமூக வலைதளப் பக்கத்தில் பதிவிட்டுள்ளார்.இந்தியாவில் நாடாளுமன்றம் மற்றும் மாநில சட்டப்பேரவைகளுக்கு ஐந்து ஆண்டுகளுக்கு ஒருமுறை தேர்தல் நடத்தப்படுகிறது. ஒவ்வொரு சட்டமன்றத்தின் பதவிக்காலம் முடிவடையும் காலத்திற்கு ஏற்ப தேர்தல் நடைபெறுகிறது.
இதனால், அடிக்கடி தேர்தல் நடைபெறுவதால் மக்கள் நலத்திட்டங்களை செயல்படுத்த முடியவில்லை எனக் கூறிய ஆளும் பாஜக அரசு நாடு முழுவதும் ஒரே நாடு ஒரே தேர்தல் திட்டத்தை செயல்படுத்த முனைப்பு காட்டி வருகிறது. ஒரே நாடு ஒரே தேர்தல் மசோதா நடப்பு நாடாளுமன்ற குளிர் கால கூட்டத் தொடரில் தாக்கல் செய்ய ஒன்றிய அமைச்சரவை ஒப்புதல் வழங்கியுள்ளது. இதில் பல சவால்கள் உள்ளன!
ஒரே நாடு ஒரே தேர்தல் தொடர்பாக பல்வேறு சாதக பாதக அம்சங்கள் கூறப்பட்டாலும், இதை அமல்படுத்துவதில் பல சவால்கள் உள்ளன. ஒரே நாடு ஒரே சட்டத்தை அமல்படுத்த அரசியல் அமைப்பில் திருத்தம் கொண்டு வர வேண்டியது அவசியம். நாடாளுமன்றத்தில் மூன்றில் இரண்டு பங்கு மெஜாரிட்டி இருந்தால்தான் இதை நிறைவேற்ற முடியும். அது மட்டும் இன்றி நாட்டில் உள்ள மொத்த மாநிலங்களில் பாதிக்கும் மேற்பட்ட மாநிலங்கள் இதை ஏற்றுக்கொண்டு ஒப்புதல் அளிக்க வேண்டும். அரசியல் அமைப்பு சட்டம் பிரிவுகள் 83, 85(2)b, 174, (2) (B), 356 மற்றும் 75(3) ஆகியவற்றில் திருத்தம் செய்ய வேண்டும். மக்கள் பிரநிதித்துவ சட்டம் 1951-லும் முக்கிய திருத்தங்கள் செய்ய வேண்டியது அவசியம்.
நடைமுறை மற்றும் சிக்கல்கள்!
அதுமட்டும் இன்றி நாடு முழுக்க ஒரே நேரத்தில் தேர்தல் நடத்த வேண்டும் என்றால் மின்னணு வாக்குப்பதிவு இயந்திரங்கள் பெருமளவில் தேவைப்படும். பாதுகாவலர்கள் எண்ணிக்கையும் அதிகம் தேவைப்படும். இதுபோன்ற பல்வேறு நடைமுறை சிக்கல்கள் உள்ளன. இந்த மசோதா நிறைவேறி எல்லாம் சரியாக நடந்தால் அடுத்த 2029-–ல் ஒரே நாடு ஒரே தேர்தல் நடத்தப்பட வாய்ப்புள்ளது. ஆனால் தற்போதைய பா.ஜ.க. கூட்டணி அரசுக்கு நாடாளுமன்றத்தில் மூன்றில் இரண்டு பங்கு பெரும்பான்மை இல்லை என்பது கவனிக்கத்தக்கது.
- முதல்வர் மு.க.ஸ்டாலின்
கடும் எதிர்ப்பு!
இந்நிலையில் இதற்கு எதிர்ப்பு தெரிவித்து முதல்வர் மு.க.ஸ்டாலின் அவர்கள் வெளியிட்டுள்ள பதிவில், இந்திய ஜனநாயகத்தின் மீதான இத்தாக்குதலை நம் ஆற்றல் அனைத்தையும் ஒன்று திரட்டி எதிர்ப்போம் என்று குறிப்பிட்டுள்ளார். ‘ஒரே நாடு ஒரே தேர்தல்’ சட்டமுன்வடிவை நாடாளுமன்றத்தில் தாக்கல் செய்ய ஒன்றிய அமைச்சரவை ஒப்புதல் அளித்துள்ளதற்கு எதிர்ப்பு தெரிவித்து முதலமைச்சர் மு.க. ஸ்டாலின் அவர்களின் சமூக வலைதளப் பதிவு செய்துள்ளார்
கொடுங்கோன்மைக்கு வழிவகுக்கும், ‘ஒரே நாடு ஒரே தேர்தல்’ சட்டமுன்வடிவை நாடாளுமன்றத்தில் தாக்கல் செய்ய ஒன்றிய அமைச்சரவை ஒப்புதல் அளித்துள்ளது.
நடைமுறைக்கு ஒவ்வாத, மக்களாட்சிக்கு எதிரான இந்த நடவடிக்கை மாநிலங்களின் குரலை அழித்துவிடும்; கூட்டாட்சி யியலைச் சிதைத்துவிடும் ; அரசின் ஆட்சி நிர்வாகத்துக்குத் தடையினை ஏற்படுத்தும்.
எழுக இந்தியா!
இந்திய ஜனநாயகத்தின் மீதான இந்தத் தாக்குதலை நம் ஆற்றல் அனைத்தையும் ஒன்று திரட்டி எதிர்ப்போம்!
இவ்வாறு முதல்வர் மு.க.ஸ்டாலின் அவர்கள் இதை தனது பதிவில் குறிப்பிட்டுள்ளார்.