களியக்காவிளை அருகே சொகுசு காரில் வாலிபர் சடலம் மீட்பு

களியக்காவிளை போலீஸ் நிலையத்துக்கு உட்பட்ட படந்தாலுமூடு அருகே சாலையோரம் நேற்று இரவு வெகு நேரமாக ஒருகார் நின்றது. இதனால் சந்தேகம் அடைந்த அக்கம் பக்கத்தில் வசிப்ப வர்கள் நள்ளிரவில் அந்த காரின் அருகே சென்று எட்டி பார்த்தனர்.

அப்போது வாலிபர் ஒருவர் ரத்த வெள்ளத்தில் காருக்குள் பிணமாக கிடந்தார். இதைப்பார்த்து அதிர்ச்சி அடைந்த அவர்கள் உடனே போலீசுக்கு தகவல் தெரிவித்தனர். அதன் பேரில் களியக்காவிளை போலீசார் சம்பவ இடத்துக்கு விரைந்து சென்றனர்.

பின்னர் காரின் உள்ளே பார்த்தபோது கழுத்து அறுக்கப்பட்ட நிலையில் வாலிபர் பிணமாக கிடந்தது தெரியவந்தது. காருக்குள் கடந்த ஆதார் கார்டை கைப்பற்றிய போலீசார் நடத்திய விசாரணையில் உயிரிழந்து கிடந்தது கேரள மாநிலம் திருவனந்தபுரம் பகுதியை சேர்ந்த தீபு என்பது தெரியவந்தது.

இதைத் தொடர்ந்து பிணத்தை போலீசார் கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி. வைத்தனர். இதனிடையே அந்த பகுதியில் உள்ள சிசிடிவி கேமரா காட்சிகளை போலீசார் ஆய்வு செய்த போது,காரில் இருந்து ஒருவர் இறங்கி நடந்து செல்வது போன்ற காட்சிகள் பதிவாகி உள்ளது தெரிய வந்துள்ளது.

சிசிடிவி பதிவுகளை கைப்பற்றிய போலீசார் விசாரணையை தீவிரப்படுத்தி உள்ளனர். தீபு எதற்காக களியக்காவிளை வந்தார்,அவரை கொலை செய்தது யார் என்பது குறித்தும் விசாரணை நடத்தப்பட்டு வருகிறது.