உதயநிதி ஸ்டாலின் பரப்புரை

ஈரோடு கிழக்கு தொகுதி இடைத்தேர்தலில், முதல்வர் மு.க.ஸ்டாலின் தேர்தல் வியூகங்களும், துணை முதல்வர் உதயநிதி ஸ்டாலினின் தேர்தல் பரப்புரையும் தான், தனது வெற்றிக்கு உறுதுணையாக இருக்க போவதாக, திமுக மாநிலக் கொள்கை பரப்பு இணைச் செயலாளர் வி.சி. சந்திரகுமார் தெரிவித்துள்ளார். இதுகுறித்து வி.சி.சந்திரகுமார் கூறியதாவது : ஈரோடு கிழக்கு தொகுதி இடைத்தேர்தலில் திமுக சார்பில் போட்டியிட வாய்ப்பு அளித்த முதல்வர் மு.க.ஸ்டாலினுக்கும் , துணை முதல்வர் அமைச்சர் உதயநிதி ஸ்டாலினுக்கும், முதலில் எனது நன்றியை தெரிவித்துக் கொள்கிறேன். தமிழ்நாட்டில் முதல்வர் மு.க.ஸ்டாலின் ஆட்சிக்கு வந்த பிறகு செய்யப்பட்டுள்ள மக்கள் நலத்திட்டங்கள். குறிப்பாக, மகளிர் உரிமைத் தொகை, விடியல் பயணம், புதுமைப்பெண் திட்டம், காலை உணவு திட்டம் போன்ற பல்வேறு மக்கள் நலத்திட்டங்கள் தான் இந்த தேர்தல் உடைய கதாநாயகனாக இருக்கப் போகிறது. அதுமட்டுமின்றி, மிகப்பெரிய வாக்கு வித்தியாசத்தில் திராவிட முன்னேற்ற கழகம் வெற்றி பெறும். அதேபோன்று, முதல்வர் மு.க.ஸ்டாலின் தேர்தல் வியூகங்களும், துணை முதல்வர் உதயநிதி ஸ்டாலினின் தேர்தல் பரப்புரையும் தான் இந்த தேர்தலில் எனக்கு மாபெரும் வெற்றிக்கு உறுதுணையாக இருக்க போகிறது. இவ்வாறு அவர் தெரிவித்தார்.