செஞ்சி அருகே கும்பாபிஷேகத்திற்கான ஏற்பாடு பணி தீவிரம்

செஞ்சி அடுத்த மணலப்பாடி புதுார் கிராமத்தில் தண்டு மாரியம்மன் கோவிலில் நாளை மகா கும்பாபிஷேகம் நடக்கிறது.விழாவையொட்டி, இன்று 15ம் தேதி மாலை 6:00 மணிக்கு கணபதி ஹோமம், விக்னேஸ்வர பூஜையும், பிரவேச பலியும், இரவு 7:30 மணிக்கு கும்ப அலங்காரம், கலச பிரதிஷ்டை, முதல் கால யாகசாலை பூஜை நடக்கிறது.

10:00 மணிக்கு யந்திர பிரதிஷ்டையும், அஷ்ட பந்தன மருந்து சாற்றுதலும் நடக்கிறது.நாளை 16ம் தேதி காலை 6:00 மணிக்கு கோபூஜை, விக்னேஷ்வர பூஜை, நாடி சந்தானம், தத்வார்ச்சனை, இரண்டாம் கால யாகசாலை பூஜையும், 9:00 மணிக்கு மகா பூர்ணாஹுதியும், தொடர்ந்து, யாத்ரா தானமும், கடம் புறப்பாடாகி காலை 10:00 மணிக்கு விநாயகர், முருகர், தண்டு மாரியம்மன் விமான கலசங்களுக்கு மகா கும்பாபிஷேகம் நடக்கிறது.

10:30 மணிக்கு மூலவர் மகா அபிஷேகமும், மகா தீபாராதனையும் நடக்கிறது. இரவு 8:00 மணிக்கு வாணவேடிக்கையுடன் சுவாமி வீதியுலா நடக்கிறது.