இரண்டு பெண்களிடம் 10 சவரன் தங்க நகை கொள்ளை - இருவர் கைது

சேலம் மாவட்டம், சங்ககிரி அருகேயுள்ள கஸ்தூரிபட்டி பகுதியில் டீக்கடைக்கு சென்று கொண்டிருந்த மூதாட்டி மற்றும் நாகிசெட்டிப்பட்டி பகுதியில் காய்கறி கடையின் முன்பு நின்று பேசிக் கொண்டிருந்த பெண் ஆகிய இருவரிடமும் இருசக்கர வாகனத்தில் தலைக்கவசம் அணிந்து கொண்டு வந்த மர்ம நபர்கள் அடுத்தடுத்து இரு பெண்களிடம் கடந்த மாதம் 10 சவரன் தங்கச் சங்கிலியை பறித்துக் கொண்டு தப்பிச்சென்றனர். இது குறித்து இரு பெண்களும் சங்ககிரி காவல் நிலையத்தில் அளித்த புகாரின் பேரில் வழக்கு பதிவு செய்த சங்ககிரி போலீசார் தனிப்படை அமைத்து மர்ம நபர்களை தீவிரமாக தேடி வந்தனர்.

இந்நிலையில், சிசிடிவி காட்சிகளை வைத்து கொள்ளையர்களை தேடி வந்த போலீசார் சேலம் கெங்கவல்லி கடம்பூர் பகுதியைச் சேர்ந்த தங்கவேல் (27)திருப்பூர் பாராபாளையம் பகுதியைச் சேர்ந்த ஜோதிபாஸ் (43) ஆகிய இருவரையும் கைது செய்து இரு பெண்களிடம் கொள்ளையடித்துச்சென்ற 10 சவரன் தங்க நகைகளை பறிமுதல் செய்து சங்ககிரி குற்றவியல் நீதிமன்றத்தில் ஆஜர்படுத்தி சேலம் மத்திய சிறையில் அடைத்தனர். இச்சம்பவம் அப்பகுதியில் பெரும் பரபரப்பு ஏற்படுத்தியது.