பக்தர்கள் சென்ற வேன் கவிழ்ந்து விபத்து

கிருஷ்ணகிரி மாவட்டம் பூந்தோட்டம் பகுதியை சேர்ந்த 15-க்கும் மேற்பட்டவர்கள் மேல்மருவத்தூர் ஆதிபராசக்தி கோவிலுக்கு சாமி தரிசனம் செய்வதற்காக நேற்று ஒரு வேனில் புறப்பட்டனர், இந்த வேன், இரவு செஞ்சி கோட்டை அருகே வந்து கொண்டிருந்த போது, அங்குள்ள சாலை வளைவில் டிரைவர் வேனை திருப்பினார். அப்போது அவரது கட்டுப்பாட்டை இழந்த வேன், அங்குள்ள பள்ளத்தில் தலைகீழாக கவிழ்ந்தது. இடிபாடுகளுக்குள் சிக்கி இருந்தவர்கள் கூச்சலிட்டனர், அக்கம்பக்கத்தில் இருந்தவர்கள் அவர்களை மீட்டு சிகிச்சைக்காக செஞ்சி அரசு மருத்துவமனைக்கு அனுப்பி வைத்தனர். இதில், லட்சுமி (வயது 35), பவித்ரா (30), அஸ்வினி (29) ஆகியோர் காயமடைந்தனர். இவர்களில் லட்சுமி மேல்சிகிச்சைக்காக முண்டியம்பாக்கம் அரசு மருத்துவகல்லூரி மருத்துவமனைக்கு அனுப்பி வைக்கப்பட்டார், விபத்து பற்றி தகவல் அறிந்த செஞ்சி போலீசார், விபத்து நடந்த இடத்துக்கு நேரில் சென்று பார்வையிட்டு விசாரித்தனர். மேலும் இது தொடர்பாக போலீசார் வழக்குப்பதிவு செய்து விசாரணை மேற்கொண்டு வருகிறார்கள்.