குளிக்க சென்ற தொழிலாளி குளத்தில் மூழ்கி பலி

குமரி மாவட்டம் திங்கள்சந்தை அருகே உள்ள புதுக்குளம் கரையில் வசித்து வருபவர் ரெத்தினசாமி. இவருக்கு ராமகிருஷ்ணன் (45) வெல்டராக வேலை பார்த்து வந்தார். இவர் நேற்று காலை குளத்தில் குளிக்க சென்றார். ஆனால் நெடுநேரம் ஆகியும் ராமகிருஷ்ணன் வீடு திரும்பவில்லை. இதனால் சந்தேகம் அடைந்த அவரது உறவினர்கள் மற்றும் நண்பர்கள் குளத்தில் சென்று தேடினர். ஆனால் அவரை கண்டுபிடிக்க முடியவில்லை.இது குறித்த தகவலின் பேரில், குளச்சல் தீயணைப்பு வீரர்கள் குளத்தில் இறங்கி தேடினர். பின்னர் ராமகிருஷ்ணன் உடலை மீட்டனர். இதையடுத்து அவரது உடல் பிரேத பரிசோதனைக்காக ஆசாரிப்பள்ளம் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டது. சம்பவம் குறித்து இரணியல் போலீசார் வழக்குப் பதிவு செய்து விசாரணை நடத்தி வருகின்றனர். குளத்தில் மூழ்கி பலியான ராமகிருஷ்ணனுக்கு இன்னும் திருமணம் ஆகவில்லை.