அதிமுகவில் இருந்து முன்னாள் அமைச்சர் அன்வர் ராஜா நீக்கம்!!

அதிமுக அமைப்பு செயலாளரும், முன்னாள் எம் பியுமான அன்வர் ராஜா, ஆரம்பத்தில் இருந்தே அதிமுக - பாஜக கூட்டணியால் அதிருப்தியில் இருந்து வருகிறார். ராமநாதபுரத்தை சேர்ந்த அன்வர் ராஜா அதிமுக ஆட்சியில் தொழிலாளர் நலத்துறை அமைச்சராக இருந்தார். ஏற்கனவே பாஜகவுடன் அதிமுக கூட்டணி வைத்திருந்த போதும் அக்காட்சியை தொடர்ந்து விமர்சித்து வந்த அன்வர் ராஜா, சி ஏ ஏ சட்ட திருத்தத்திற்கு அதிமுக ஆதரவு அளித்தபோதும், நாடாளுமன்றத்தில் எதிர்த்து பேசி இருந்தார். இந்த நிலையில், அண்மையில் நாளிதழ் ஒன்றிற்கு பேட்டியளித்திருந்த போது, தமிழ்நாட்டில் ஒருபோதும் பாஜக கால் ஊன்ற முடியாது என அவர் தெரிவித்திருந்தார். அவரது பேட்டி அதிமுக - பாஜக கூட்டணியில் சலசலப்பை ஏற்படுத்தியது. இந்த நிலையில் அதிமுகவில் இருந்து வெளியேறிய அன்வர் ராஜா, இன்று தன்னை திமுகவில் இணைத்துக்கொள்கிறார். சென்னை அண்ணா அறிவாலயத்தில் முதலமைச்சர் மு.க.ஸ்டாலின் தலைமையில் திமுகவில் இணைகிறார். இதற்காக அண்ணா அறிவாலயம் சென்றுள்ள அவர் முதலமைச்சர் மு.க.ஸ்டாலினை சந்தித்து பேசி வருகிறார். அவர் திமுகவில் இணைய உள்ளதாக செய்திகள் வெளியான நிலையில், அதிமுகவின் அடிப்படை உறுப்பினர் உள்பட அனைத்து பொறுப்புகளில் இருந்தும் அன்வர் ராஜா நீக்கம் செய்யப்பட்டுள்ளார். அவரை கட்சியில் இருந்து நீக்கி அதிமுக பொதுச்செயலாளர் எடப்பாடி பழனிசாமி அறிவிப்பு வெளியிட்டுள்ளார்.