நான் வெளிநாட்டுக்குபோய் வெள்ளி ஸ்பூனில் சாப்பிட்டதே ஒரு சாதனைதான்: ஈபிஎஸ்

மதுரை மாவட்டம் திருப்பரங்குன்றம் பகுதியில் அதிமுக பொதுச்செயலாளர் எடப்பாடி பழனிசாமி சுற்றுப்பயணம் மேற்கொண்டார். அப்போது பேசிய எடப்பாடி பழனிசாமி, “மதுரை மாநகராட்சி ஊழலுக்கு, மேயரின் கணவரை கைது செய்துள்ளார்கள். மேயர் இந்திராணியை காப்பாற்ற, அவரது கணவரை கைது செய்துள்ளார்கள். அதிமுக ஆட்சிக்கு வந்தது, இதுபற்றி முழுமையாக விசாரித்து, தவறு செய்தவர்கள் சிறைக்கு அனுப்பப்படுவர். ஜல்லிக்கட்டுக்கு பெயர் போன அவனியாபுரத்தில், ஜல்லிக்கட்டு காளைக்கு சிலை வைக்கப்படும். மதுரை மாநகராட்சியில் 200 கோடி ஊழல் நடந்துள்ளது. குடிநீர் வரி, வீட்டு வரி, குப்பைக்கு கூட வரி போட்டு, அதில் இப்போது 200 கோடி ஊழல் செய்துள்ளது திமுக அரசு. இன்று எல்லா துறையிலும் ஊழல் நடக்கிறது. தமிழகத்தில் 6000 மதுக்கடைகளில், ஒரு நாளைக்கு சுமார் 1.5 கோடி பாட்டில்கள் விற்கின்றன. அதை ரூ.10 அதிகம் வைத்து விற்கிறார்கள். ஒரு நாளைக்கு 15 கோடி, ஆண்டுக்கு 5000 கோடி ஊழல் செய்கிறார்கள். ஸ்டாலின் இப்போது வெளிநாடு சென்றுள்ளார். இப்போதாவது சைக்கிள் ஓட்டாமல், தொழில் முதலீடுகளை ஈர்க்க வேண்டும் என ஏற்கனவே நான் அறிக்கை வெளியிட்டுள்ளேன். அதிமுக ஆட்சியில் உலக முதலீட்டாளர்கள் மாநாட்டை நடத்தி, வேலைவாய்ப்புகளை உருவாக்கித் தந்தது. நான் வெள்ளை அறிக்கை கேட்டால், அமைச்சர் TRB ராஜா, நான் வெளிநாடு சென்று வெள்ளி ஸ்பூனில் சாப்பிட்டதே பெரிய சாதனை என்கிறார். ஆமாம், நான் விவசாயி. எனக்கு அது சாதனை தான். உங்கள் அப்பா மத்திய அமைச்சராக இருந்தவர். நீங்க தங்க ஸ்பூன்ல சாப்பிடுவீங்க. சட்டம் ஒழுங்கை பாதுகாக்கும் டிஜிபி கடந்த 31ம் தேதி ஒய்வுப்பெற்றுவிட்டார். அவர் ஓய்வு பெறுவதற்கு முன்பாகவே அதற்கான பட்டியலை UPSC-க்கு திமுக அரசு அனுப்ப வேண்டும். ஆனால் அந்த பதவிக்கு கூட உரிய நேரத்தில் ஒருவரை இவர்களால் நியமிக்க இயலவில்லை. தங்களுக்கு வேண்டியவர்களை எல்லாம் பதவிக்கு கொண்டு வருகிறார்கள். இப்படி காவல்துறையில் பணிகளை நிரப்பினால், எப்படி சட்டம் ஒழுங்கு சீராக இருக்கும்? ராணுவம் நாட்டை காப்பது போல, காவல்துறை மக்களை காக்க வேண்டும் என்றார்.