சிவகாசியில் பூட்டிய வீட்டில் ஜன்னலை அறுத்து நகை பணம் திருட்டு

விருதுநகர் மாவட்டம் சிவகாசி பொதிகை நகரில் பூட்டிய வீட்டின் ஜன்னல் கம்பியை அறுத்து உள்ளே சென்ற மர்ம நபர்கள் 50 பவுன் நகை மற்றும் ரூ.90 ஆயிரம் பணத்தை திருடி சென்றனர்.இந்த மாதத்தில் ஆளில்லாத வீடுகளை குறிவைத்த நடக்கும் 3 வது திருட்டு சம்பவம் என்பதால் பொதுமக்கள் அச்சத்தில் உள்ளனர். விருதுநகர் மாவட்டம் சிவகாசி பொதிகை நகரை சேர்ந்தவர் ஜெகநாதன்(60). இவரது மனைவி மனைவி கீதா. இவர்களுக்கு இரு மகன்கள் உள்ளனர். ஒருவர் வெளிநாட்டிலும், மற்றொருவர் வெளியூரிலும் வேலை பார்த்து வருகின்றனர். ஜெகநாதன் அச்சு தொழில் செய்து வந்தார். இந்நிலையில் கடந்த இரு நாட்களுக்கு முன் ஜெகநாதன் குடும்பத்துடன் திருப்பதி கோயிலுக்கு சென்றார். இன்று அதிகாலை வீட்டிற்கு வந்து பார்த்த போது, பீரோவில் இருந்த 50 பவுன் நகை மற்றும் ரூ.90 ஆயிரம் பணத்தை காணவில்லை. கதவு உடைக்கப்படாமல் இருந்தால், வீட்டில் ஆய்வு செய்த போது, ஜன்னல் கம்பியை அறுத்து உள்ளே வந்த மர்ம நபர்கள் நகை மற்றும் பணத்தை திருடி சென்றது தெரியவந்தது. இதுகுறித்த புகாரில் சிவகாசி நகர் போலீஸார் வழக்கு பதிவு செய்து குற்றவாளிகளை தேடி வருகின்றனர். விருதுநகரில் இருந்து கை ரேகை நிபுணர்கள் மற்றும் மோப்ப நாய் வரவழைக்கப்பட்டு விசாரணை நடைபெற்றது.