மகனிடம் தகராறு செய்ததை தட்டிக் கேட்ட தொழிலாளிக்கு கத்திக்குத்து

சேலம் களரம்பட்டியை சேர்ந்தவர் விஜி (வயது 43). இவர் பீரோ பட்டறையில் தொழிலாளியாக வேலை பார்த்து வருகிறார். இவருக்கு திருமணமாகி 2 மகன்கள் உள்ளனர். நேற்று முன்தினம் அவருடைய மூத்த மகன் ராஜி வீட்டின் அருகே நண்பர்களுடன் பேசி கொண்டிருந்தார். அப்போது அந்த வழியாக மோட்டார் சைக்கிளில் வந்த 2 பேர் திடீரென ராஜியிடம் தகராறு செய்தனர். இதை பார்த்து அங்கு வந்த விஜி, மகனிடம் தகராறு செய்தவர்களை தட்டிக்கேட்டார். அப்போது அவர்களில் ஒருவன், தான் வைத்திருந்த கத்தியை எடுத்து விஜியை குத்தினான். பின்னர் அவர்கள் 2 பேரும் அங்கிருந்து தப்பி சென்றுவிட்டனர். இதையடுத்து காயமடைந்த விஜியை அக்கம் பக்கத்தினர் மீட்டு சிகிச்சைக்காக சேலம் அரசு ஆஸ்பத்திரிக்கு அனுப்பி வைத்தனர். அங்கு அவருக்கு டாக்டர்கள் சிகிச்சை அளித்தனர். இதுகுறித்து கிச்சிப்பாளையம் போலீஸ் நிலையத்தில் புகார் கொடுக்கப்பட்டது. அதன்பேரில் போலீசார் வழக்குப்பதிவு செய்து விஜியை கத்தியால் குத்தி சென்ற மர்ம நபர்களை வலைவீசி தேடி வருகின்றனர்.