வர்ணம் பூசாத வேகத்தடை: வாகன ஓட்டிகள் அச்சம்

காஞ்சிபுரம் மாவட்டம் வாலாஜாபாத் ஒன்றியம், ஏனாத்துாரில் இருந்து வையாவூர் செல்லும் சாலையில், புறா குளம் அருகில் இருமுனை சாலை சந்திப்பில், வாகன ஓட்டிகள் விபத்தில் சிக்குவதை தவிர்க்க, இரு இடங்களில் வேகத்தடை அமைக்கப்பட்டுள்ளது.

வேகத்தடைகளுக்கு வெள்ளை நிற வர்ணம் பூசப்படாததாலும், இரவில் ஒளிரும் பிரதிபலிப்பான் ஒட்டப்படாமலும் உள்ளதால், வேகமாக வரும் இருசக்கர வாகன ஓட்டிகள் வேகத்தடை உள்ள பகுதியில் விபத்தில் சிக்குகின்றனர். குறிப்பாக, இரவு நேரத்தில் இச்சாலையில் வேகமாக வரும் வாகன ஓட்டிகள், வேகத்தடையை கவனிக்காமல் நிலை தடுமாறி கீழே விழுந்து, விபத்தில் சிக்குவதாக கிராமத்தினர் புகார் தெரிவிக்கின்றனர்.

எனவே, வேகத்தடைக்கு வெள்ளை நிற வர்ணம் பூசுவதோடு, இரவில் ஒளிரும் வகையில், ஒளி பிரதிபலிப்பான் அமைக்க வேண்டும் என, வாகன ஓட்டிகள் வலியுறுத்தியுள்ளனர்."