வேலகவுண்டன்பட்டி அருகேடிராக்டர் மீது மோட்டார் சைக்கிள் மோதி காண்டிராக்டர் பலி.

பரமத்திவேலூர்,ஆக.10-  நாமக்கல் மாவட்டம் வெண்ணந்தூர் அருகே உள்ள மதியம்பட்டியை சேர்ந்தவர் செட்டியண்ணன் (65) பைப்லைன் காண்டிராக்டர். இவர் சம்பவத்தன்று தனது மோட்டார் சைக்கிளில் நாமக்கல் சென்றுள்ளார். பின்னர் மீண்டும் தனது வீட்டிற்கு செல்வதற்காக நாமக்கல்லில் இருந்து வேலகவுண்டம்பட்டி வழியாக வெண்ணந்தூருக்கு தனது மோட்டார் சைக்கிளின் பின்னால் ஸ்ரீரங்கன் (60) என்பவரை அமரவைத்துக் கொண்டு சென்று கொண்டிருந்தார். அடக்கலாம்பட்டி அருகே உள்ள கொட்டாம்பட்டி பஸ் நிறுத்தம் பகுதியில் சென்று கொண்டிருந்த போது முன்னாள் சென்று கொண்டிருந்த டிராக்டர் மீது மோட்டார் சைக்கிள் எதிர்பாராத விதமாக மோதியுள்ளது. இதில் மோட்டார் சைக்கிளில் இருந்து தூக்கி வீசப்பட்டு படுகாயம் அடைந்த செட்டியண்ணன் சம்பவ இடத்திலேயே பலியானார்.அதை பார்த்த அவ்வழியாகவந்தவர்கள் விபத்து குறித்து வேலகவுண்டம்பட்டி போலீசாருக்கு தகவல் தெரிவித்தனர். தகவல் அறிந்து அங்கு வந்த போலீசார் செட்டியண்ணனின் உடலை மீட்டு பிரேத பரிசோதனைக்காக நாமக்கல் அரசு மருத்துவக் கல்லூரி மருத்துவமனைக்கு அனுப்பி வைத்தனர். மேலும்  செட்டியண்ணனின் மோட்டார் சைக்கிளில் பின்னால் அமர்ந்து வந்து படுகாயம் அடைந்த ஸ்ரீரங்கனை காப்பாற்றி நாமக்கல் அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர். விபத்து குறித்து வேலகவுண்டம்பட்டி போலீசார் வழக்குப்பதிவு செய்து  தப்பியோடிய டிராக்டர் டிரைவரை தேடி வருகின்றனர்.