இயற்கை உபாதைக்கு சென்றவர் சாவு போலீஸ் விசாரணை

மணலுார்பேட்டை அடுத்த கடுவனுார் கிராமத்தைச் சேர்ந்தவர் சிதம்பரம் மகன் விஜய், 32 ; இவரது மனைவி நதியா, 25; திருமணமாகி 5 ஆண்டுகள் ஆகிறது. இரண்டு பிள்ளைகள் உள்ளனர். நேற்று முன்தினம் ஜம்படை கிராமத்தில் உள்ள நதியாவின் தாய் வீட்டில் குலதெய்வ வழிபாட்டிற்காக விஜய் சென்றிருந்தார். நேற்று முன்தினம் நள்ளிரவு 1:00 மணியளவில் இயற்கை உபாதை கழிப்பதற்காக விஜய் வெளியில் சென்றார். இந்நிலையில், நேற்று 6:30 மணி அளவில் ஜம்படை பஸ் நிறுத்தம் அருகே உள்ள கால்வாயில் நீரில் மூழ்கிய நிலையில் இறந்து கிடந்தார். இது குறித்து அவரது மனைவி நதியா கொடுத்த புகாரின் பேரில் மணலுார்பேட்டை போலீசார் வழக்குப் பதிந்து விஜய் இறப்பு குறித்து விசாரித்து வருகின்றனர்.