பனமரத்துப்பட்டியில் நீச்சல் பழக சென்ற மாணவன் கிணற்றில் மூழ்கி பலி

சேலம் மாவட்டம் பனமரத்துப்பட்டி மாருதிநகரை சேர்ந்த சதாசிவம் மகன் ராகுல் (வயது 14). மல்லூரில் உள்ள தனியார் பள்ளியில் 9-ம் வகுப்பு படித்து வந்தான். விடுமுறை நாள் என்பதால் தனது நண்பர்களுடன் வீட்டின் அருகில் உள்ள தோட்டத்தில் கிணற்றில் நீச்சல் பழக ராகுல் சென்றுள்ளான். கிணற்றில் இறங்கி குளித்த அவன் திடீரென தண்ணீரில் மூழ்கினான். நீண்டநேரம் ஆகியும் தண்ணீரை விட்டு ராகுல் வெளியே வராததால் உடன் சென்றவர்கள் அதிர்ச்சி அடைந்தனர். உடனே அக்கம் பக்கத்தில் இருந்தவர்களிடம் ராகுல் தண்ணீரில் மூழ்கிய விவரத்தை கூறினர். தகவல் அறிந்த சேலம் தீயணைப்பு நிலைய வீரர்கள் விரைந்து வந்தனர். சுமார் ஒரு மணி நேர தேடுதலுக்கு பிறகு ராகுல் பிணமாக மீட்கப்பட்டான். ராகுல் உடலை மீட்ட பனமரத்துப்பட்டி போலீசார் பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். ராகுல் இறந்தது தொடர்பாக போலீசார் வழக்குப்பதிவு செய்து விசாரணை நடத்தினர். நீச்சல் பழக சென்ற மாணவன் கிணற்றில் மூழ்கி பலியான சம்பவம் அந்த பகுதியில் சோகத்தை ஏற்படுத்தியது.