நாகர்கோவில் வலம்புரி விளை குப்பை கிடங்கில் மீண்டும் தீ விபத்து

குமரி மாவட்டம் நாகர்கோவில் மாநகராட்சி குப்பை கிடங்கு வலம்புரி விளையில் உள்ளது. மாநகராட்சியில் உள்ள அனைத்து பகுதி குப்பைகளும் இங்கு சேகரிக்கப்படுகின்றன. இந்த குப்பைகளை தற்போது பயோ மைனிங் முறையில் அகற்றப்பட்டு வருகின்றன.   இதற்காக மூன்று இயந்திரங்கள் மூலம் மட்கும் குப்பைகள், மட்காத குப்பைகள் என  தரம் பிரிக்கப்படுகின்றன.      மட்காத  குப்பைகள் சிமெண்ட் ஆலைகளுக்கு அனுப்பி வைக்கப்படுகிறது. மட்கும் குப்பைகள் உரமாக மாற்றப்படுகின்றன.  இருப்பினும் இந்த பகுதியில் மலை போல் குவிந்துள்ள குப்பையில் அடிக்கடி தீ விபத்து ஏற்படுவது வாடிக்கையாக உள்ளது.         ஏற்கனவே கடந்த சில மாதங்களுக்கு முன் தீ  விபத்து ஏற்பட்டது. ஒரு வாரம் வரை போராடி தீயணைப்பு வீரர்கள் தீயை அணைத்தனர். இந்த நிலையில் இன்று காலை மீண்டும் குப்பை கிடங்கில் திடீரென தீ பிடித்தது. இது பற்றி தீயணைப்பு துறையினருக்கு தகவல் தெரிவிக்கப்பட்டது. மாவட்ட தீயணைப்பாளர் சத்திய குமார் உத்தரவின் பேரில் தீயணைப்பு துறையினர் சென்று தீயை  அணைக்கும் பணியில் ஈடுபட்டு வருகிறார்கள்.       தீ விபத்தால்  அந்த பகுதி முழுவதும் புகை மண்டலமாக மாறி உள்ளது. இதனால் வாகன ஓட்டிகள் பெரும் சிரமத்திற்கு உள்ளாகி வருகின்றனர். மேலும் துர்நாற்றமும் வீசி வருகிறது. தீ விபத்துக்கான காரணம் தெரியவில்லை. குப்பைகளை பொக்லைன் மூலம் கிளறிதான் தீயை அணைக்க முடியும் என்பதால் தீயணைப்பு வீரர்களும் பெரும் சிரமத்தில் உள்ளனர்.