முதலமைச்சர் கோப்பைக்கான மாவட்ட அளவிலான விளையாட்டுப் போட்டி

திண்டுக்கல் மாவட்ட விளையாட்டு மைதானத்தில், முதலமைச்சர் கோப்பைக்கான மாவட்ட அளவிலான விளையாட்டுப் போட்டிகளை மாவட்ட ஆட்சித்தலைவர் பூங்கொடி பழனி சட்டமன்ற உறுப்பினர் செந்தில்குமார் முன்னிலையில் தொடங்கி வைத்தார். இந்நிகழ்ச்சியில் மாவட்ட ஆட்சித்தலைவர் பூங்கொடி தெரிவித்ததாவது:- தமிழ்நாடு விளையாட்டு மேம்பாட்டு ஆணையம், இளைஞர் நலன் மற்றும் விளையாட்டு மேம்பாட்டுத்துறை சார்பில் முதலமைச்சர் கோப்பைக்கான மாவட்ட அளவிலான விளையாட்டுப் போட்டிகள்-2024, இன்று தொடங்கி 24.09.2024 வரை நடத்தப்படுகிறது. பள்ளி, கல்லூரி மாணவ, மாணவிகள், பொதுமக்கள், அரசு ஊழியர்கள் மற்றும் மாற்றுத்திறனாளிகள் ஆகிய ஐந்து பிரிவுகளில் பல்வேறு வகையான விளையாட்டுப் போட்டிகள் ஆண், பெண் இருபாலரும் பங்கேற்கும் வகையில், மாவட்ட அளவில் 27 விளையாட்டுக்கள், 53 வகைகளில் மாவட்ட, மண்டலம் மற்றும் மாநில அளவில் போட்டிகள் நடத்தப்பட உள்ளன. இணையதளத்தின் வாயிலாக பதிவு செய்தவர்கள் மட்டுமே போட்டிகளில் கலந்து கொள்ள அனுமதிக்கப்படுவர். போட்டிகளில் கலந்து கொள்ள வருபவர்கள் தங்களது ஆதார் நகல், பிறந்த தேதி சான்று, பள்ளி மற்றும் கல்லூரியில் பயில்வதற்கான சான்று (Bonafide or ID card), மற்றும் வங்கி கணக்கு புத்தகத்தின் முதல் பக்க நகல், அரசு ஊழியர்கள் (பணிபுரியும் அடையாள அட்டை), மாற்றுத்திறனாளிகள் (மாற்றுத்திறனாளிகளுக்கான அடையாள அட்டை), பொதுப் பிரிவு (இருப்பிட சான்று) ஆகியவற்றை கண்டிப்பாக கொண்டு வருதல் வேண்டும். மேலும் போட்டிகளில் கலந்து கொள்ளும் வீரர், வீராங்கனைகள் அனைவரும் கண்டிப்பாக விளையாட்டுச் சீருடை மற்றும் காலணியுடன் பங்கேற்க வேண்டும். திண்டுக்கல் மாவட்ட அளவிலான பல்வேறு போட்டிகளில் பங்கேற்க மொத்தம் 21,626 வீரர், வீராங்கனைகள் தங்கள் பெயர்களை பதிவு செய்துள்ளனர். போட்டிகள் தொடக்க நாளான இன்று(10.09.2024) பள்ளி மாணவ, மாணவிகளுக்கான தடகளம், கேரம், கூடைப்பந்து மற்றும் கிரிக்கெட், பள்ளி மற்றும் கல்லுாரி மாணவ, மாணவிகளுக்கான நீச்சல், மேஜைப்பந்து, பள்ளி மாணவிகளுக்கான ஹாக்கி, பள்ளி மாணவர்களுக்கான கபாடி ஆகிய போட்டிகள் தொடங்கி வைக்கப்பட்டுள்ளன. இன்றையதினம் மட்டும் 550 வீரர், வீராங்கனைகள் பல்வேறு போட்டிகளில் பங்கேற்கின்றனர். தமிழ்நாடு அரசின் சார்பில் பல்வேறு விளையாட்டுப் போட்டிகள் தொடர்ந்து நடைபெறுவதால் திண்டுக்கல் மாவட்டத்தினைச் சேர்ந்த இளைஞர்கள் மற்றும் பள்ளி, கல்லூரி மாணவ, மாணவிகள் ஒவ்வொரு வரும் தங்கள் திறனுக்கேற்ற விளையாட்டினை தேர்ந்தெடுத்து அதில் தங்கள் திறனை மேம்படுத்திக் கொண்டு, சர்வதேச மற்றும் தேசிய அளவிலான விளையாட்டுப் போட்டிகளில் பங்கேற்று வெற்றிபெற்று மாவட்டத்திற்கு பெருமை சேர்க்க வேண்டும், என மாவட்ட ஆட்சித்தலைவர் பூங்கொடி தெரிவித்தார். மாவட்ட ஆட்சித்தலைவர் பூங்கொடி தடகளப் போட்டியில் வெற்றி பெற்ற வீரர்களுக்கு வாழ்த்து தெரிவித்து, போட்டிகளில் பங்கேற்கவுள்ள விளையாட்டு வீரர்கள், வீராங்கனைகள் சாதனைப்படைக்க வாழ்த்துக்களை தெரிவித்தார். இந்நிகழ்ச்சியில், திண்டுக்கல் வருவாய் கோட்டாட்சியர் சக்திவேல், செய்தி மக்கள் தொடர்பு அலுவலர் நாகராஜபூபதி, மாவட்ட விளையாட்டு மற்றும் இளைஞர் நல அலுவலர் சிவா, திண்டுக்கல் மேற்கு வட்டாட்சியர் ஜெயபிரகாஷ், பயிற்சியாளர்கள், விளையாட்டு வீரர் மற்றும் வீராங்கனைகள் உட்பட பலர் கலந்துகொண்டனர்.