விருத்தாசலம் அருகே நின்று கொண்டிருந்தவர் மீது மோட்டார் சைக்கிள் மோதி விபத்து

விருத்தாசலம் அடுத்த பெரம்பலூர் கிராமத்தைச் சேர்ந்தவர் நமசிவாயம் (வயது 60). இவரது மகன் அன்பு செழியன் மாற்றுத்திறனாளியாக இருப்பதால் நேற்று முன்தினம் பள்ளிக்கூடம் சென்று தனது மகனை அழைத்துக் கொண்டு தாலுகா அலுவலகத்திற்கு சென்று மாற்றுத்திறனாளிக்கான நிதி உதவி பெறுவதற்காக மனு கொடுத்துவிட்டு மீண்டும் பஸ்சில்  கொடுக்கூர் பஸ் நிறுத்தத்திற்கு வந்துள்ளார். அவரது மகன் அன்பு செழியன் சைக்கிளை எடுப்பதற்காக சென்றுவிட்ட நிலையில் நமச்சிவாயம் கொடுக்கூர் பஸ் நிறுத்தம் அருகே சாலையோரம் நின்று கொண்டிருந்தார். அப்போது அப்பகுதி வழியாக வந்த ஒரு மோட்டார் சைக்கிள் நமசிவாயம் மீது மோதியது. இதில் நமசிவாயம் படுகாயம் அடைந்தார். உடன் அங்கிருந்தவர்கள் அவரை மீட்டு விருத்தாசலம் அரசு மருத்துவமனையில் சிகிச்சைக்காக சேர்த்தனர். ஆனால் அங்கு அவர் சிகிச்சை பலனின்றி இறந்தார். இது குறித்து புகாரின் பேரில் விருத்தாசலம் போலீசார் வழக்கு பதிவு செய்து விசாரணை நடத்தி வருகின்றனர்.