வாணாபுரத்தில் விழிப்புணர்வு கூட்டம்

வாணாபுரத்தில் புள்ளியியல் மற்றும் பொருளியல் துறை சார்பில் தேர்தல் தொடர்பான அறிவு, அணுகுமுறை மற்றும் நடைமுறைகள் பற்றிய விழிப்புணர்வு குழு விவாத கூட்டம் நடந்தது. வாணாபுரத்தில் நடந்த கூட்டத்திற்கு புள்ளியியல் துணை இயக்குநர் முத்துக்குமரன் தலைமை தாங்கினார். ரிஷிவந்தியம் வேளாண் உதவி இயக்குநர் சியாம்சுந்தர், ஊராட்சி தலைவர் தீபாஅய்யனார் முன்னிலை வகித்தனர்.திருக்கோவிலுார் கோட்ட புள்ளியியல் உதவி இயக்குநர் செல்வராஜ் கூட்டத்தை தொடங்கி வைத்தார். தேர்தல் ஆணையம் அறிவுறுத்தலின்படி, ஓட்டளிப்பது தொடர்பான தகவல்கள் பொது மக்களுக்கு தெரிகிறதா என்பதை கண்டறிய கூட்டம் நடத்தப்பட்டது. விவாதத்தில், பங்கேற்ற 25 - 40 வயதுக்குட்பட்ட பெண்களிடம் ஓட்டுச்சாவடி நிலைய அலுவலர்கள் யார், தபால் ஓட்டளிக்கும் உரிமை யாருக்கு உள்ளது. தேர்தல் தொடர்பான புகாரினை தெரிவிக்க உள்ள செயலி உட்பட நாடாளுமன்ற, சட்டசபை மற்றும் உள்ளாட்சி தேர்தல் தொடர்பான கேள்விகள் கேட்டறியப்பட்டு, ஓட்டினை அதிகரிக்க மேற்கொள்ள வேண்டிய பணிகள் குறித்து அறிவுறுத்தப்பட்டது. கூட்டத்தில், புள்ளியியல் ஆய்வாளர் கணேஷ் உட்பட பலர் கலந்து கொண்டனர். ஊராட்சி செயலாளர் சேகர் நன்றி கூறினார்.