பூண்டிபாளையம்- டூவீலர் - கார் நேருக்கு நேர் மோதல். ஒருவர் உயிரிழப்பு.

பூண்டிபாளையம்- டூவீலர் - கார் நேருக்கு நேர் மோதல். ஒருவர் உயிரிழப்பு. திருப்பூர் மாவட்டம், காங்கேயம், செட்டிபாளையம் அருகே உள்ள தோப்பு தோட்டம் பகுதியைச் சேர்ந்தவர் மூர்த்தி வயது 46. இவரது மனைவி மீனாட்சி வயது 42. இவர்கள் இருவரும் அக்டோபர் 31ஆம் தேதி காலை 10:15 மணியளவில், கரூர் மாவட்டம், தென்னிலை காவல் நிலைய எல்லைக்கு உட்பட்ட, கார்வில் பகுதியில் இருந்து வைரமடை செல்லும் சாலையில் அவர்களது டூவீலரில் சென்று கொண்டிருந்தனர். இவர்களது வாகனம் பூண்டிப்பாளையம் களம் அருகே சென்றபோது, எதிர் திசையில் கரூர் மாவட்டம், புகலூர் தாலுகா, க.பரமத்தி மெயின் ரோடு பகுதியைச் சேர்ந்த பாலசுப்பிரமணியன் மகன் எதுநாதன் வயது 21 என்பவர் வேகமாக ஓட்டி வந்த கார், மூர்த்தி ஓட்டிச் சென்ற டூவீலர் மீது நேருக்கு நேர் மோதி விபத்து ஏற்பட்டது. இந்த விபத்தில் தலையில் பலத்த காயம் அடைந்த மூர்த்தியை மீட்டு கரூர் அமராவதி மருத்துவமனைக்கு சிகிச்சைக்காக கொண்டு சென்றனர். அங்கு பரிசோதித்த மருத்துவர்கள் மூர்த்தி உயிர் இழந்துவிட்டதாக தெரிவித்தனர். இந்த சம்பவம் அறிந்த மூர்த்தியின் சகோதரி வசந்தி வயது 44 என்பவர் அளித்த புகாரின் பேரில், சம்பவ இடத்துக்கு விரைந்து வந்த காவல்துறையினர், மூர்த்தியின் உடலை உடற்கூறு ஆய்வுக்காக கரூர் அரசு மருத்துவக் கல்லூரி மருத்துவமனை சவக்கிடங்குக்கு எடுத்துச் சென்றனர். மேலும், சம்பவம் தொடர்பாக வழக்கு பதிவு செய்து, காரை வேகமாகவும், அஜாக்கிரதையாகவும் ஓட்டி விபத்து ஏற்படுத்திய எதுநாதன் மீது வழக்கு பதிவு செய்துள்ளனர் தென்நிலை காவல்துறையினர்.