அகில பாரத சன்னியாசிகள் சங்கம் சார்பில் காவிரி தாய்க்கு சிறப்பு பூஜை.

பரமத்தி வேலூர், நவ.6: பரமத்தி வேலூர் தாலுகாவில் உள்ள ஜேடர்பாளையம் மற்றும் வேலூர் காவிரி ஆற்றில் அகில பாரத சன்னியாசிகள் சங்கம் மற்றும் அன்னை காவிரி நதிநீர் பாதுகாப்பு சங்கம் சார்பில் அன்னை காவிரி தாய்க்கு சிறப்பு பூஜைகள் நடைபெற்றது. அகில பாரத சன்னியாசிகள் சங்கம் மற்றும் அன்னை காவேரி நதிநீர் பாதுகாப்பு சங்கத்தினர் காவிரி நதியை தூய்மையாக வைத்துக் கொள்ள வேண்டியதன் அவசியத்தை பொதுமக்களிடையே கொண்டு சென்று விழிப்புணர்வு ஏற்படுத்தும் வகையில் கடந்த 14 ஆண்டுகளாக துலா தீர்த்த  ரத யாத்திரையை நடத்தி வருகின்றனர். காவிரி விழிப்புணர்வு  துலா தீர்த்த ரத யாத்திரை அகில பாரத சன்னியாசிகள் சங்க நிறுவனர் ஸ்ரீமத் சுவாமி இராமானந்த மகராஜ் தலைமையில் கடந்த மாதம் 20- ஆம் தேதி கர்நாடக மாநிலம், குடகு மலை, தலை காவிரியில் இருந்து புறப்பட்டு கர்நாடக மாநிலத்தில் உள்ள பல்வேறு பகுதிகளிலும், தமிழகத்தில் ஒசூர், ஒகேனக்கல், பவானி, உள்ளிட்ட பகுதிகளில் காவிரி தாய்க்கு சிறப்பு பூஜைகள் செய்து வழிபட்டனர். அதனைத் தொடர்ந்து நேற்று பரமத்தி வேலூர் ஒரு தாலுகா  ஜேடர்பாளையம் மற்றும் வேலூர் காவிரி ஆற்றில் ஸ்ரீமத் சுவாமி இராமானந்த மகராஜ் தலைமையில் காவிரி தாய்க்கு சிறப்பு அபிஷேக ஆராதனைகளும், சிறப்பு அலங்காரமும், மகா தீபாராதனையும் நடைபெற்றது. அதனை தொடர்ந்து காவிரி தாய்க்கு நன்றி செலுத்தும் விதமாக காவிரி ஆற்றில் பூக்களைத் தூவி வழிபட்டனர்.