பரமத்தி வேலூர் அருகே அடையாளம் தெரியாத வாகனம் மோதிய விபத்தில் ஒருவர் பலி

பரமத்தி வேலூர், நவ.6: பரமத்தி வேலூர் அருகே அடையாளம் தெரியாத வாகனம் மோதி அடையாளம் தெரியாத நபர் பலியானது குறித்து வேலூர் போலீசார் வழக்கு பதிவு செய்து விசாரணை நடத்தி வருகின்றனர். பரமத்திவேலூரில் கரூரில்‌ இருந்து சேலம் செல்லும் பைபாஸ் சாலையில் படமுடிபாளையம் பஸ் நிறுத்தம் அருகில் நேற்று முன்தினம் (திங்கட்கிழமை) இரவு  சாலையின் ஓரத்தில்  நடந்து  சென்று கொண்டு இருந்த பெயர் விலாசம் தெரியாத சுமார் (50) வயது மதிக்கத்தக்க ஆண் ஒருவர் மீது அடையாளம் தெரியாத வாகனம் மோதி விட்டு நிற்காமல் சென்று விட்டது. இதில் அவருக்கு தலை மற்றும் பல்வேறு இடங்களில் பலத்த காயம் ஏற்பட்டு சம்பவ இடத்திலேயே பலியானார். அதை பார்த்த  அந்த வழியாக வந்தவர்கள் வேலூர் போலீசாருக்கு தகவல் தெரிவித்துள்ளனர். தகவல் அறிந்து சம்பவ இடத்திற்கு வந்த போலீசார் ஆம்புலன்ஸ் வாகனம் மூலம் அடையாளம் தெரியாத நபரின் உடலை மீட்டு பிரேத பரிசோதனைக்காக  வேலூர் அரசு மருத்துவமனையில் சேர்த்தனர். அடையாளம் தெரியாத வாகனம் மோதி பலியானவர் யார், எந்த ஊர், எதற்காக அப்பகுதிக்கு வந்தார் என்பது குறித்து போலீசார் விசாரணை நடத்தி வருகின்றனர். மேலும் அடையாளம் தெரியாத நபர் மீது மோதி விட்டு நிற்காமல் சென்ற அடையாளம் தெரியாத வாகனம் குறித்தும் வேலூர் போலீசார் வழக்கு பதிவு செய்து விசாரணை நடத்தி வருகின்றனர்.