இந்திரா நகரில் சென்டர் மீடியனில் கார் மோதி விபத்து. ஒருவர் உயிரிழப்பு.

இந்திரா நகரில் சென்டர் மீடியனில் கார் மோதி விபத்து. ஒருவர் உயிரிழப்பு. விருதுநகர் மாவட்டம், ஸ்ரீவில்லிபுத்தூர், என் ஜி ஓ காலனியை சேர்ந்தவர் சாய் பிரவீன் வயது 25 என்பவர், பொலிரோ காரை நவம்பர் 13ஆம் தேதி இரவு 9 மணி அளவில், கரூர் - மதுரை சாலையில் ஓட்டி வந்து கொண்டிருந்தார். இந்த காரில் அவரது நண்பர்கள், இராமநாதபுரம் மாவட்டம், பரமக்குடி, வைகை நகர் பகுதியை சேர்ந்த தினகரன் வயது 30, ஸ்ரீவில்லிபுத்தூர் என் ஜி ஓ காலனி சேர்ந்த ஸ்வர்ண குமார் வயது 33 ஆகியோர் உடன் பயணித்தனர். இந்த கார் கரூர் மாவட்டம், அரவக்குறிச்சி காவல் நிலைய எல்லைக்கு உட்பட்ட, பள்ளப்பட்டி, இந்திரா நகர் அருகே வந்தபோது, வேகமாக காரை இயக்கியதால், கார் கட்டுப்பாட்டை இழந்து சென்டர் மீடியனில் மோதி விபத்து ஏற்பட்டது. இந்த விபத்தில் மூன்று பேருக்கும் பலத்த காயங்கள் ஏற்பட்டது. இதில் ஸ்வர்ணகுமாரை அரவக்குறிச்சி அரசு மருத்துவமனையில் சிகிச்சைக்கு அனுமதித்தனர். ஆயினும் சிகிச்சை பலனின்றி உயிரிழந்தார். இதே போல தினகரனை மீட்டு கரூர் அமராவதி மருத்துவமனையிலும், சாய் பிரவீனை கோவை கங்கா மருத்துவமனையிலும் சிகிச்சைக்காக அனுமதித்தனர். சம்பவம் குறித்து தினகரன் அளித்த புகாரின் பேரில் சம்பவ இடத்திற்கு சென்று விசாரணை மேற்கொண்ட காவல்துறையினர், உயிரிழந்த ஸ்வர்ணகுமாரின் உடலை உடற்கூறு ஆய்வுக்காக அரவக்குறிச்சி அரசு மருத்துவமனை சவக்கிடங்குக்கு அனுப்பி வைத்து, இது தொடர்பாக காரை வேகமாக ஓட்டி விபத்து ஏற்படுத்திய சாய் பிரவீன் மீது வழக்கு பதிவு செய்தனர் அரவக்குறிச்சி காவல்துறையினர்.