பனமரத்துப்பட்டி அருகே நண்பர்களுடன் குளித்த கல்லூரி மாணவர்

சேலம் மாவட்டம் பனமரத்துப்பட்டி பேரூராட்சிக்குட்பட்ட நல்லியாம்புதூர் பகுதியை சேர்ந்தவர் கார்த்திபன். இவரது மகன் ஜெகதீஷ் (வயது 20). இவர் திருச்செங்கோட்டில் உள்ள தனியார் கல்லூரியில் 2-ம் ஆண்டு படித்து வந்தார். நேற்று மதியம் ஜெகதீஷ் தனது நண்பர்களுடன் அடிமலைப்பட்டி கரடிக்காடு பகுதியில் உள்ள குட்டையில் குளிக்க சென்றார். அப்போது நண்பர்கள் அனைவரும் குட்டையில் குளித்த போது ஜெகதீஷ் திடீரென தண்ணீரில் மூழ்கினார். இதை கண்டு அதிர்ச்சியடைந்த அவரது நண்பர்கள் அவரை காப்பாற்ற முயன்றனர். அதற்குள் அவர் தண்ணீரில் மூழ்கி விட்டார். இதனால் அவர்கள் மேலே வந்து காப்பாற்றுங்கள், காப்பாற்றுங்கள் என கூச்சலிட்டனர். சத்தம் கேட்டு அக்கம்பக்கத்தினர் விரைந்து வந்து குட்டையில் இறங்கி ஜெகதீசை தேடினர். அப்போது ஜெகதீஷ் குட்டையில் மூழ்கி இறந்து விட்டது தெரியவந்தது. இதையடுத்து பொதுமக்கள் அவரது உடலை மீட்டு மேலே கொண்டு வந்தனர். இது குறித்து தகவல் அறிந்த பனமரத்துப்பட்டி போலீசார் சம்பவ இடத்திற்கு விரைந்து சென்று ஜெகதீசின் உடலை கைப்பற்றி பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர். நண்பர்களுடன் குளித்த போது குட்டையில் மூழ்கி கல்லூரி மாணவர் இறந்த சம்பவம் அந்த பகுதியில் சோகத்தை ஏற்படுத்தியது.