திருச்சியில் நடைபெற்ற கிறிஸ்துமஸ் சிறப்பு திருப்பலி

இயேசு கிறிஸ்து பூமியில் அவதரித்த நாளை கிறிஸ்துமஸ் பெருவிழாவாக கிறிஸ்தவர்கள் கொண்டாடுகின்றனர். அந்த வகையில், இயேசு பிறந்த தினமான டிச. 25 உலகம் முழுவதும் கிறிஸ்துமஸ் விழா கோலாகலமாக கொண்டாடப்பட்டது. கிறிஸ்துமஸ் பண்டிகைக்கு ஒரு மாதத்துக்கு முன்பே, கிறிஸ்தவர்கள் தங்கள் வீடுகளில் நட்சத்திர விளக்குகளையும், இயேசு மாட்டுத் தொழுவத்தில் பிறந்ததை குறிக்கும் வகையில் குடில்கள், கிறிஸ்துமஸ் மரங்கள் அமைத்து அதில் வண்ண விளக்குகளையும் ஒளிர வைத்து, பண்டிகைக்கு தயாராகி வந்தனர். மேலும், கிறிஸ்துமஸ் தாத்தா வேடம் அணிந்து குழந்தைகளுக்கு பரிசுகளையும், இனிப்புகளையும் வழங்கி கொண்டாடி மகிழ்கின்றனர். அந்த வகையில் திருச்சி மேலப்புத்தூரில் அமைந்துள்ள புனித மரியன்னை பேராலயத்தில் மறைமாவட்ட ஆயர் ஆரோக்கிய ராஜ் தலைமையில் கிறிஸ்துமஸ் சிறப்பு திருப்பலி நடைபெற்றது. கிறிஸ்து பிறக்கும் வேத பாடல் ஆலயத்தில் முழங்க ஏசு கிறிஸ்து பிறந்தது அறிவிக்கப்பட்டது. அதேபோல் மெயின் கார்டு கேட் அருகே உள்ள புனித லூர்து அன்னை ஆலயம், பாலக்கரை எடத்தெருவில் சகாய மாதா பசிலிக்கா உள்ளிட்ட தேவாலயங்களில் கிறிஸ்துமஸ் சிறப்பு திருப்பலி நடைபெற்றது.