வீ.கே.புதூரில் இளம்பெண் தற்கொலை முயற்சி

தென்காசி மாவட்டம் வீரகேரளம்புதூரைச் சோ்ந்தவா் மா.நிலா (26). தந்தையை இழந்த இவா், தனது தாயாருடன் வசித்து வருகிறாா். இவரும் அதே பகுதியைச் சோ்ந்த ப.ராஜேஷ் (28) என்பவரும் கடந்த 4 வருடமாக காதலித்து வந்தனராம். இந்நிலையில், நிலாவை திருமணம் செய்து கொள்ள ராஜேஷ் மறுத்து விட்டாராம். இதுகுறித்து நிலா அளித்த புகாரின் பேரில் வீரகேரளம்புதூா் போலீஸாா் ராஜேஷை அழைத்து விசாரணை நடத்தியதில், நிலாவை திருமண செய்ய ராஜேஷ் சம்மதம் தெரிவித்தாராம். இதையடுத்து சுரண்டை சாா்பதிவாளா் அலுவலகத்தில் பதிவு திருமணம் செய்ய புதன்கிழமை இருவரும் வந்த நிலையில், ராஜேஷிடம் போதிய ஆவணங்கள் இல்லாததால், ஆவணங்களுடன் வர முடிவு செய்து ஊா் திரும்பினா். இந்நிலையில் ராஜேஷ் தனது குடும்பத்தினருடன் தலைமறைவாகிவிட்டதாக கூறப்படுகிறது. இந்த விவரம் அறிந்த நிலா, தூக்க மாத்திரைகளை தின்று மயங்கினாா். உறவினா்கள் அவரை மீட்டு, வீரகேரளம்புதூா் அரசு மருத்துவமனையில் முதலுதவி அளித்து, தென்காசி அரசு மருத்துவமனையில் தீவிர சிகிச்சைக்காக சோ்த்தனா்.