தோட்டிகோட்டில் பாலம் அமைக்கும் பணிகள் தீவிரம்

குமரி மாவட்டத்தில் 20 ஆண்டுகளுக்கு மேலாக  நான்கு வழிச்சாலை பணிகள் நடந்து வருகின்றன. முடங்கி கிடந்த இந்த பணிகள் தற்போது வேகமாக நடந்து வருகின்றன. நாகர்கோவில் – பெருங்குடி (காவல்கிணறு) நான்கு வழிச்சாலை பணிகள் முடிவடைந்து, தற்போது வாகன போக்குவரத்து நடந்து வருகிறது. காரோடு – வில்லுக்குறி, வில்லுக்குறி – நாகர்கோவில், நாகர்கோவில் – கன்னியாகுமரி இடையிலான பணிகள் இன்னும் முடிவடையாமல் நடந்து வருகின்றன. கிடப்பில் உள்ள நான்கு வழிச்சாலையில் 28 பெரிய பாலங்கள், 33 சிறிய பாலங்கள் உள்பட சுமார் 60 பாலங்கள் அமைக்கும் பணி தீவிரமாக நடந்து வருகின்றன.   இதில் கன்னியாகுமரி – காரோடு வரையிலான நான்கு வழிச்சாலையில், புத்தேரி பெரிய குளத்தின் மேல் அமைய உள்ள பாலம் முக்கியத்துவம் வாய்ந்ததாக உள்ளது. இந்த பால பணிகள் தற்போது வேகமாக நடந்து வருகின்றன.  இதேபோல் தோட்டிகோடு சந்திப்பிலும் நான்கு வழிச்சாலைக்கான பாலம் அமைக்கப்படுகிறது. 3 பிரிவுகளாக பாலம் அமைக்கப்பட்டு வருகிறது. இந்த பாலத்துக்கான கான்கிரீட் கூடுவைகள் (பாக்ஸ் வடிவமைப்பு கொண்டது) நேற்று வந்திறங்கின. ஜூன் மாதத்துக்கு பின் மழை தொடங்கி விடும் என்பதால், ஏப்ரல், மே மாதங்களுக்குள் பணிகளை விரைந்து முடிக்க திட்டமிட்டுள்ளதாக அதிகாரிகள் கூறி உள்ளனர்.