ராமநாதபுரம் கல்லூரி ஆண்டு விழா நடைபெற்றது

ராமநாதபுரம் மாவட்டம் கமுதி பசும்பொன் தேவர் கல்லூரியில் நடைபெற்ற ஆண்டுவிழா நிகழ்ச்சியில் விளையாட்டு போட்டிகளில் ஒட்டுமொத்த சாம்பியம் பட்டத்தை வென்ற ஆங்கிலத்துறை மாணவர்களுக்கு கேடயம் வழங்கிய கல்லூரி நிர்வாகம் மற்றும் சிறப்பு விருந்தினர்கள். கமுதி, மார்ச் 28: கமுதி பசும்பொன் தேவர் கல்லூரியில் ஆண்டுவிழா மற்றும் விளையாட்டு விழா நிகழ்ச்சி வெள்ளிக்கிழமை நடைபெற்றது. ராமநாதபுரம் மாவட்டம் கமுதி கோட்டைமேட்டில் உள்ள பசும்பொன் முத்துராமலிங்கப்க்தேவர் நினைவுக் கல்லூரியின் 55--வது ஆண்டு விழா மற்றும் விளையாட்டு விழா கல்லூரியின் முதல்வர் கோ.தர்மர் தலைமையில், பொந்தம்புளி முன்னாள் ஊராட்சி மன்ற தலைவர் ராமமூர்த்தி, ஆசிரியர் புதுக்கோட்டை எம்.ஏ.கணேசன் ஆகியோரது முன்னிலையில் நடைபெற்றது. இவ்விழாவில் கமுதி அடுத்துள்ள செங்கப்படை அதானி கிரீன் எனர்ஜி சோலார் மின் உற்பத்தி நிலையத்தின் மக்கள் தொடர்பு அலுவலர் வி.ஜனார்த்தனன் சிறப்பு விருந்தினராக கலந்து கொண்டு மாணவர்கள் மத்தியில் சிறப்புரையாற்றினார். மேலும் தேவர் கல்லூரிக்கு தேவையான உள்கட்டமைப்பு வசதிகளை அதானி சோலார் நிறுவனத்துடன் கலந்து ஆலோசித்து அனைத்து வசதிகளும் ஏற்படுத்தித் தரப்படும் என உறுதி அளித்தார். சென்ற மாதம் அதானி நிறுவனம் சார்பில் ரூ.12 லட்சம் மதிப்பீட்டில் கல்லூரி வளாகத்தில் மாணவிகளுக்கான ஓய்வு அறை கட்டடம் கட்டிமுடித்து, கல்லூரி நிர்வாகத்திடம் ஒப்படைக்கப்பட்டது குறிப்பிடத்தக்கது. ஆண்டு விழா நிகழ்ச்சியில் கல்லூரியின் முதல்வர் கோ.தர்மர் ஆண்டு அறிக்கை வாசித்தார். முன்னதாக கல்லூரியின் ஆங்கிலத்துறை பேராசிரியர் சரவணகுமார் வரவேற்றார். இதனைத் தொடர்ந்து கல்லூரியில் நடைபெற்ற விளையாட்டுப் போட்டிகளில் வெற்றி பெற்ற, மாணவ மாணவிகளுக்கு பதக்கம், நினைவு பரிசு, சான்றிதழ்கள் வழங்கப்பட்டது. இதனையடுத்து மாணவிகளின் கலை நிகழ்ச்சிகள் நடைபெற்றது. விழாவில் கல்லூரியின் முன்னாள் மாணவர் சங்க செயலாளர் ஆறுமுகம், முன்னாள் பொருளாளர் கோட்டை இளங்கோவன், பேராசிரியர்கள், அலுவலகப் பணியாளர்கள் உள்ளிட்டார் கலந்து கொண்டனர். வரலாற்று துறை பேராசிரியர் ஜெயக்காளை நன்றி கூறினார்.