பேராவூரணி அருகே அரசு பேருந்து மோதி அடையாளம் தெரியாத நபர் பலி

X

விபத்து
தஞ்சாவூர் மாவட்டம் பேராவூரணி அருகே அரசு பேருந்து மோதி இறந்து கிடந்தவர் யார் என்பது குறித்து காவல்துறையினர் விசாரணை நடத்தி வருகிறார்கள். இது பற்றிய விவரம் வருமாறு: சனிக்கிழமை இரவு பேராவூரணியில் இருந்து சென்னை செல்ல வேண்டிய அரசுப் பேருந்து திருச்சிற்றம்பலம் - பட்டுக்கோட்டை சாலையில் உள்ள புனல்வாசல் பிரிவு சாலை அருகே சென்று கொண்டிருந்தது. அப்போது எதிரே வந்த ஒரு நபர், சாலையை கடக்க முயன்றுள்ளார். எதிர்பாராத விதமாக கட்டுப்பாட்டை இழந்த அரசு பேருந்து அவர் மீது மோதியது. இந்த சம்பவத்தில் அந்த நபர் தலை நசுங்கி சம்பவ இடத்திலேயே உயிரிழந்தார். இதுகுறித்து தகவல் அறிந்த திருச்சிற்றம்பலம் காவல்துறையினர் சம்பவ இடத்தை பார்வையிட்டு உடலைக் கைப்பற்றி, பட்டுக்கோட்டை அரசு மருத்துவமனை பிரேத காப்பகத்தில் உடலை வைத்துள்ளனர். இறந்தவர் ஊதா நிறத்தில் ஒரு போர்வையும், சிவப்பு நிறத்தில் ஒரு துண்டும் அணிந்திருந்தார். அரசு பேருந்து ஓட்டுநர் பட்டுக்கோட்டை நகர காவல் நிலையத்தில் சரண் அடைந்துள்ளார். இது குறித்து திருச்சிற்றம்பலம் காவல்துறையினர் வழக்குப் பதிவு செய்து இறந்தவர் யார்? எந்த ஊரைச் சேர்ந்தவர் என்பது குறித்து விசாரணை நடத்தி வருகிறார்கள்.
Next Story