பேராவூரணி அருகே மாட்டு வண்டி, குதிரை வண்டி எல்கைப் பந்தயம் 

பேராவூரணி அருகே மாட்டு வண்டி எல்கைப் பந்தயம் நடைபெற்றது. பந்தயத்தை அமைச்சர் சிவ.வீ.மெய்யநாதன், எம்எல்ஏ நா.அசோக்குமார் தொடங்கி வைத்தனர். தஞ்சாவூர் மாவட்டம், பேராவூரணி அருகே , கோரவயல்காடு கிராமத்தில் திருவள்ளுவர் இளைஞர் நற்பணி மன்றம் சார்பில், 13 ஆம் ஆண்டு மாட்டுவண்டி எல்கைப் பந்தயம்  ஞாயிற்றுக்கிழமை நடைபெற்றது.  இதனை, தமிழ்நாடு பிற்படுத்தப்பட்டோர் மற்றும் சீர் மரபினர் நலத்துறை அமைச்சர் சிவ.வீ.மெய்யநாதன், பேராவூரணி சட்டமன்ற உறுப்பினர் நா.அசோக்குமார் ஆகியோர் கொடியசைத்து தொடங்கி வைத்தனர். இதில் பெரிய மாடு, கரிச்சான் மாடு, பூஞ்சிட்டு மாடு, தேன்சிட்டு மாடு, நடுக்குதிரை, கரிச்சான் குதிரை என 6 பிரிவுகளாக நடத்தப்பட்ட போட்டியில், தஞ்சாவூர், திருச்சி, புதுக்கோட்டை, சிவகங்கை, மதுரை உள்ளிட்ட பல்வேறு மாவட்டங்களைச் சேர்ந்த 100-க்கும் மேற்பட்ட மாட்டு வண்டிகள் பங்கேற்றன.  வெற்றி பெற்ற மாட்டுவண்டிகளின் உரிமையாளர்களுக்கு, சுமார் ரூ.4 லட்சம் மொத்தப் பரிசாக வழங்கப்பட்டது. பந்தயத்தில் கலந்து கொண்ட மாட்டு வண்டிகள் எல்கையை நோக்கி சீறிப்பாய்ந்தன.  மாட்டுவண்டி பந்தயத்தை சாலையில் இருமருங்கிலும் இருந்து ஆயிரக்கணக்கான பந்தயக்கலா ரசிகர்கள் கண்டுகளித்தனர்.  காவல்துறையினர் பாதுகாப்பு ஏற்பாடுகளைச் செய்திருந்தனர்.