கோடைப் பருவத்துக்கு ஏற்ற நெல் ரக விதைகளை மட்டுமே விற்பனை செய்ய வேண்டும் : விதை ஆய்வு துணை இயக்குனர்

கோடைப் பருவத்துக்கு ஏற்ற தரமான நெல் ரக விதைகளை மட்டுமே விவசாயிகளுக்குவிற்பனை செய்ய வேண்டும் என, தஞ்சாவூர் மாவட்ட விதை ஆய்வு துணை இயக்குனர் சுஜாதா விதை விற்பனையாளர்களுக்கு அறிவுரை வழங்கியுள்ளார். இதுகுறித்து அவர் வெளியிட்டுள்ள அறிக்கையில் கூறியிருப்பதாவது,  தஞ்சாவூர் மாவட்டத்தில், சம்பா பருவ நெற்பயிர் அறுவடைக்குப் பின் தற்போது கோடை நெல் சாகுபடி மேற்கொள்ளும் விவசாயிகள் நாற்றங்கால் தயார் செய்யும் பணிகளில் ஈடுபட்டு வருகிறார்கள். இந்நிலையில், தனியார் விதை விற்பனையாளர்கள் சான்று விதைகளில் இரு அட்டைகள் (வெள்ளை அல்லது நீலநிறம்) முறையே சான்று அட்டை மற்றும் விவர அட்டை பொருத்தப்பட்ட விதைகளையே விவசாயிகளுக்கு விற்பனை செய்யப்பட வேண்டும்.  விவர அட்டையில் பயிர், ரகம், நிலை, குவியல் எண், காலாவதி நாள், பயிர் செய்ய ஏற்ற பருவம், உற்பத்தியாளர் விவரம் உள்ளிட்ட 14 வகையான விவரங்கள் அச்சிடப்பட்டு இருக்க வேண்டும். அனைத்து தனியார் விதை விற்பனையாளர்களும், விதை இருப்பு பதிவேடு, கொள்முதல் இன்வாய்ஸ், விற்பனை ரசீது மற்றும் முளைப்பு அறிக்கை ஆகியவற்றை கட்டாயம் பராமரிக்க வேண்டும். குவியல் வாரியாக தனித்தனி பக்கங்களில் விதை இருப்பு விவரங்கள் பதிவிட வேண்டும்.  கோடை பருவத்துக்கு உகந்த தரமான நெல் விதைகளை மட்டுமே விவசாயிகளுக்கு விற்பனை செய்ய வேண்டும்.  குறுகிய கால நெல் ரகங்கள் ஆன ஏடிடீ 36, ஏடிடீ 37, ஏடிடீ 43, ஏடிடீ 45, ஏடிடீ 53, ஏடிடீ 57, ஏடிடீ 59, கோ 51, ஏஎஸ்டி 16, டிபிஎஸ் 5 போன்ற ரகங்கள் கோடை பருவத்துக்கு ஏற்ற ரகங்கள் என்பதால், தனியார் விதை விற்பனையாளர்கள் மேற்கூறிய தரமான நெல் ரகங்களின் விதைகளை கொள்முதல் செய்து விவசாயிகளுக்கு விதை சட்ட விதைகளின்படி விற்பனை செய்ய வேண்டும்.  தஞ்சாவூர், கும்பகோணம் மற்றும் பட்டுக்கோட்டை பகுதிகளில் விதை ஆய்வாளர்களால், அரசு வேளாண்மை விரிவாக்க மையங்கள் மற்றும் தனியார் விதை விற்பனை நிலையங்களில் கோடை நெல் சாகுபடிக்கு கொள்முதல் செய்து இருப்பு வைக்கப்பட்டுள்ள நெல் குவியல்களில் அலுவலக மாதிரிகள் சேகரிக்கப்பட்டு வருகிறது.  இம் மாதிரிகள் தஞ்சாவூர் காட்டுத்தோட்டத்தில் செயல்பட்டு வரும் விதை பரிசோதனை நிலையத்திற்கு முளைப்புத்திறன் குறித்த ஆய்வுக்கு அனுப்பி வைக்கப்பட்டு வருகிறது. தனியார் விதை விற்பனையாளர்கள் விதைகளை விற்பனை செய்யும்போது விவசாயிகளுக்கு கட்டாயம் ரசீது வழங்க வேண்டும். விற்பனை ரசீதில் விவசாயி மற்றும் குவியல் விவரங்கள் அவசியம் குறிப்பிட வேண்டும். எனவே, கோடை பருவத்துக்கு ஏற்ற தமிழ்நாடு மாநிலத்தில் சாகுபடி செய்ய அறிவிக்கை செய்யப்பட்ட நெல் குறுகிய கால நெல் ரகங்களை மட்டுமே விவசாயிகளுக்கு விற்பனை செய்ய அறிவுறுத்தப்படுகிறது.  கோடைப் பருவத்துக்கு உகந்தது அல்லாத நெல் ரகங்களை விற்பனை செய்தாலோ அல்லது விற்பனையில் விதி மீறல்கள் கண்டறியப்பட்டாலோ,  விதை சட்டம் 1966, விதை விதிகள் 1968 மற்றும் விதை கட்டுப்பாட்டு ஆணை 1983 இன் கீழ் சம்பந்தப்பட்டவர்கள் மேல், உரிய நடவடிக்கைகள் எடுக்கப்படும்" எனத் தெரிவித்துள்ளார்.