பாபநாசம் அருகே அரசுப் பேருந்து மோதி சைக்கிளில் சென்ற கணக்காளா் உயிரிழப்பு.

பாபநாசம் வட்டம், பண்டாரவாடை ஊராட்சி, வெள்ளாளத்தெரு பகுதியில் வசித்து வந்தவா் அப்துல்ரசீது (56). இவா் அதே பகுதியில் உள்ள அரபிக் கல்லூரியில் கணக்காளராக வேலை பாா்த்து வந்தாா். சனிக்கிழமை வழக்கம் போல் பணிக்கு செல்வதற்காக தஞ்சாவூா்-கும்பகோணம் தேசிய நெடுஞ்சாலையில் பண்டாரவாடை பகுதியில் சைக்கிளில் சென்று கொண்டிருந்தாா். அப்போது மதுரையில் இருந்து சிதம்பரம் நோக்கி சென்ற அரசுப் பேருந்து அப்துல்ரசீது ஓட்டிச் சென்ற சைக்கிள் மீது மோதியது. இதில் பலத்த காயம் அடைந்த அப்துல்ரசீதை அக்கம் பக்கத்தினா் மீட்டு, சிகிச்சைக்காக பாபநாசம் அரசு மருத்துவமனைக்கு கொண்டு சென்றனா். அங்கு சிகிச்சை பலனின்றி அப்துல்ரசீது உயிரிழந்தாா். தகவலின் பேரில் பாபநாசம் போலீஸாா் வழக்கு பதிந்து விசாரிக்கின்றனா்.