சேலம் காந்தி விளையாட்டு மைதானத்தில்

சேலம் மகாத்மா காந்தி விளையாட்டு மைதானத்தில் உள்ள நீச்சல் குளத்தில் முதற்கட்ட கோடைகால நீச்சல் பயிற்சி முகாம் நேற்று தொடங்கியது. முகாமை மாவட்ட விளையாட்டு அலுவலர் சிவரஞ்சன் தொடங்கி வைத்தார். பயிற்சியில் மாவட்டத்தின் பல்வேறு பகுதியில் உள்ள ஏராளமான சிறுவர்-சிறுமிகள் பங்கேற்றனர். அவர்களுக்கு நீச்சல் பயிற்சியின் போது செய்ய வேண்டியவை மற்றும் செய்யக்கூடாதவைகள் குறித்து பயிற்சியாளர் மகேந்திரன் அறிவுரை வழங்கினார். தொடர்ந்து முகாமில் கலந்துகொண்ட சிறுவர்-சிறுமிகளுக்கு நீச்சல் பயிற்சி அளிக்கப்பட்டது. இதுகுறித்து அதிகாரிகள் கூறும் போது, முதற்கட்ட நீச்சல் பயிற்சி முகாம் வருகிற 13-ந் தேதி வரை நடைபெறுகிறது. பயிற்சி முகாமில் சிறுவர்-சிறுமிகளுக்கு காலை 7 மணி முதல் 10 மணி வரையும், மாலை 3 மணி முதல் 5 மணி வரையும் பயிற்சி அளிக்கப்படும். இதேபோல் பெண்களுக்கு காலை 9 மணி முதல் 10 மணி வரையும், மாலை 5 மணி முதல் 6 மணி வரை நீச்சல் பயிற்சி அளிக்கப்படுவதாக கூறினர்.