கோவை: பூண்டி ஆண்டவர் கோவிலுக்குள் புகும் ஒற்றை யானை !

வெள்ளியங்கிரி மலை அடிவாரத்தில் அமைந்துள்ள பூண்டி ஆண்டவர் கோவிலுக்குள் உணவு மற்றும் தண்ணீருக்காக அடிக்கடி ஒற்றை யானை புகுவது பக்தர்களிடையே அச்சத்தை ஏற்படுத்தியுள்ளது. கோடை வெயிலின் தாக்கம் காரணமாக வனப்பகுதியில் வறட்சி நிலவுவதால், யானைகளுக்கு உணவு மற்றும் தண்ணீர் கிடைப்பது அரிதாகி வருகிறது. இதன் காரணமாக, அவ்வப்போது ஒரு ஒற்றை யானை பூண்டி வெள்ளியங்கிரி ஆண்டவர் கோவிலுக்குள் புகுந்து விடுகிறது. நேற்று இந்த யானை கோவிலுக்குள் புகுந்து அங்கிருந்த தண்ணீர் டேங்கை கவிழ்த்து தண்ணீர் குடிப்பதும், குப்பைத் தொட்டியில் கிடந்த உணவை உண்பதும் போன்ற காட்சிகள் வெளியாகி உள்ளன. இதனால் பக்தர்கள் அச்சமடைந்துள்ளனர். இந்த ஒற்றை யானையின் தேவையை கருத்தில் கொண்டு, வனத்துறையினர் வனப்பகுதிக்குள்ளேயே அதற்கு தேவையான உணவு மற்றும் தண்ணீர் கிடைப்பதற்கான ஏற்பாடுகளை செய்ய வேண்டும் என்று பக்தர்கள் கோரிக்கை விடுத்துள்ளனர். குறிப்பாக, வனப்பகுதிக்குள் நீர் தொட்டிகளை அமைப்பதோடு, யானைகளுக்கு உணவு கிடைக்கக்கூடிய வகையில் நடவடிக்கைகளை எடுக்க வேண்டும் என்றும் அவர்கள் வலியுறுத்தியுள்ளனர். வனத்துறையினர் இந்த விஷயத்தில் உடனடியாக தலையிட்டு, யானை கோவிலுக்குள் வருவதை தடுக்கவும், அதே நேரத்தில் யானையின் அடிப்படை தேவைகளை வனப்பகுதிக்குள்ளேயே பூர்த்தி செய்யவும் நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.