கோவை: ஜான் ஜெபராஜின் முன்னாள் மைத்துனர் போக்சோ வழக்கில் கைது

போக்சோ வழக்கில் ஏற்கனவே கைது செய்யப்பட்ட பிரபல கிறிஸ்தவ போதகர் ஜான் ஜெபராஜின் முன்னாள் மனைவியின் சகோதரர் பென்னட் ஹாரிஸ் (வயது 32) என்பவரையும் போலீசார் கைது செய்து சிறையில் அடைத்துள்ளனர். தென்காசி மாவட்டத்தைச் சேர்ந்த 35 வயதான ஜான் ஜெபராஜ், கிறிஸ்தவ பாடல்கள் எழுதி, இசையமைத்து, பாடி பிரபலமானவர். இவர் கோவை ஜி.என். மில்ஸ் பகுதியைச் சேர்ந்த பெண்ணை திருமணம் செய்து கோவையில் வசித்து வந்தார். கடந்த ஆண்டு ஜான் ஜெபராஜின் வீட்டில் நடந்த நிகழ்ச்சி ஒன்றில், இரண்டு சிறுமிகளுக்கு அவர் பாலியல் தொல்லை கொடுத்ததாக கோவை மத்திய அனைத்து மகளிர் காவல் நிலையத்தில் புகார் அளிக்கப்பட்டது. தலைமறைவாக இருந்த ஜான் ஜெபராஜை போலீசார் கடந்த 13-ம் தேதி மூணாறில் கைது செய்து சிறையில் அடைத்தனர். இந்நிலையில், இந்த வழக்கில் சிறுமியிடம் போலீசார் நடத்திய விசாரணையின்போது, ஜான் ஜெபராஜின் முன்னாள் மனைவியின் சகோதரரான பென்னட் ஹாரிஸும் பாலியல் தொல்லை கொடுத்ததாக வாக்குமூலம் அளித்துள்ளார். இதையடுத்து போலீசார் பென்னட் ஹாரிஸையும் நேற்று கைது செய்து கோவை மத்திய சிறையில் அடைத்து விசாரணை மேற்கொண்டு வருகின்றனர்.