வல் வில் ஓரி விழாவினை முன்னிட்டு, தூய்மைப்படுத்தும் பணி முகாமினை தொடங்கி வைத்த மாவட்ட ஆட்சியர்.

நாமக்கல் மாவட்டம், சேந்தமங்கலம் வட்டம், காரவள்ளியில், மாவட்ட நிர்வாகம் மற்றும் ரெட்கிராஸ் சார்பில் மாவட்ட ஆட்சியர் வல்வில் ஓரி விழாவினை முன்னிட்டு, பிளாஸ்டிக் கழிவுகளை அகற்றி தூய்மைப்படுத்தும் சிறப்பு முகாமினை தொடங்கி வைத்தார். நாமக்கல் மாவட்டம், கொல்லிமலைப் பகுதியில் சங்க காலத்தில் புகழ்பெற்ற கடைஏழு வள்ளல்களில் ஒருவராகத் திகழ்ந்த வல்வில் ஓரி மன்னரின் வீரத்தினையும், கொடைத்தன்மையினையும் போற்றும் வகையில் ஒவ்வொரு ஆண்டும் ஆடி மாதம் 17 மற்றும் 18 ஆகிய நாள்களில் தமிழ்நாடு அரசின் செய்தி மக்கள் தொடர்புத்துறையின் சார்பில் வல்வில் ஓரி விழா கொண்டாடப்பட்டு வருகிறது. அதன்படி, இந்த ஆண்டும் கொல்லிமலையில் வல்வில் ஓரி விழா 02.08.2025 மற்றும் 03.08.2025 ஆகிய இரண்டு நாட்கள் தமிழ்நாடு அரசின் செதி மக்கள் தொடர்புத்துறையின் சார்பில் மிகச் சிறப்பாக நடைபெற உள்ளது. வல்வில் ஓரி விழாவையொட்டி மலர் கண்காட்சி, அரசு துறைகளின் பணி விளக்க முகாம் கண்காட்சி, சுற்றுலா விழா ஆகியவை நடைபெற உள்ளன. இவ்விழாவில், பள்ளிக்கல்வித்துறை, சுற்றுலா துறை, கலைப்பண்பாட்டுத்துறை உள்ளிட்ட துறைகளின் சார்பில் பள்ளி, கல்லூரி மாணவ, மாணவியர்கள் மற்றும் நாட்டுப்புற இசைக் கலைஞர்கள் பங்கேற்கும் பரதநாட்டியம், கரகாட்டம், மயிலாட்டம், தப்பாட்டம், கிராமிய பாடல்கள், வில்லு பாட்டு, பக்தி பாடல், கிராமிய நடனம், வல்வில் ஓரியின் சிறப்புகள் குறித்த பேச்சு, சிலம்பம் போன்ற பல்வேறு கலை நிகழ்ச்சிகள் நடைபெறவுள்ளது. இந்த ஆண்டு கொல்லிமலையில் கொண்டாடப்படவுள்ள வல்வில் ஓரி விழா, சுற்றுலா விழா, மற்றும் மலர்க்கண்காட்சி விழா பசுமை திருவிழாவாக மிகச்சிறப்பாக நடத்தப்பட உள்ளது. இதன்படி, நெகிழி பயன்பாட்டினை தவிர்க்கும்பொருட்டும், துணி பைகள் பயன்படுத்துவதன் அவசியம் குறித்து பொதுமக்களுக்கு விழிப்புணர்வு ஏற்படுத்தும் வகையிலும் இன்றைய தினம் மாவட்ட ஆட்சியர் ன வல்வில் ஓரி விழாவை முன்னிட்டு, விழா நடைபெறும் இடம், கொல்லிமலை செல்லும் பாதை ஆகியவற்றை தூய்மைப்படுத்தும் பணியினை தொடங்கி வைத்தார். மாவட்ட நிர்வாகம் மற்றும் ரெட்கிராஸ் சார்பில் நடைபெற்ற இம்முகாமில் அறிஞர் அண்ணா கலைக் கல்லூரி, கோகுல்நாதா மிஷன் கல்லூரி, சி.எம்.எஸ் பொறியியல் கல்லூரிகளைச் சேர்ந்த மாணவ மாணவியர்கள் 100-க்கும் மேற்பட்டோர் கலந்து கொண்டு தூய்மை பணிகளை மேற்கொண்டனர். கொல்லிமலை செல்லும் பகுதியில் காரவள்ளி, முள்ளுக்குறிச்சி, வேலிக்காடு வழி ஆகிய இடங்களில் வனத்துறை மற்றும் காவல்துறையினரால் வாகனங்கள் ஆய்வு செய்யப்படும். இந்த ஆய்வின்போது வாகனங்களில் கொண்டுவரப்படும் ஒருமுறை பயன்படுத்தும் நெகிழி பொருட்கள் பறிமுதல் செய்யப்படும். எனவே சுற்றுலா பயணிகள் எக்காரணம் கொண்டும் ஒருமுறை பயன்படுத்தும் நெகிழி பொருட்களை கொண்டுவர வேண்டாம். சுற்றுலா பயணிகள் பயன்படுத்தும் நெகிழி குடிநீர் பாட்டில்களை மட்டும் சேகரிக்க ஆங்காங்கே தொட்டிகள் வைக்கப்பட்டுள்ளன. அவற்றில் மட்டுமே பயன்படுத்திய குடிநீர் பாட்டில்களை போடவேண்டும். கடைகளில் ஒருமுறை பயன்டுத்தும் நெகிழி பொருட்கள் பறிமுதல் செய்யப்படுவதோடு அபராதம் விதிக்கப்படும். எனவே கடை உரிமையாளர்கள் ஒருமுறை பயன்படுத்தும் நெகிழி பொருட்களை வைத்திருக்கவோ, விற்பனை செய்யவோ கூடாது என மாவட்ட ஆட்சியர் தெரிவித்துள்ளார்.நாமக்கல் மாவட்டத்தில் உங்களுடன் ஸ்டாலின் திட்ட முகாம், நாமக்கல் மாநகராட்சி பாப்பிநாயக்கன்பட்டி, திருச்செங்கோடு நகராட்சியில் ஈரோடு சாலை பொன்னுசாமி திருமண மண்டபம், குமாரபாளையம் நகராட்சியில் சேலம் சாலை ராசி மகால், கபிலர்மலை வட்டாரத்தில் சேலூர் செல்லப்பம்பாளையம் சமுதாயக்கூடம், பள்ளிபாளையம் வட்டாரத்தில் கலியனூர் அவத்திபாளையம் அரசு மேல்நிலைப்பள்ளி, வெண்ணந்தூர் வட்டாரத்தில் மசக்காளிப்பட்டி ஸ்ரீ வாரி மஹால் ஆகிய இடங்களில் உங்களுடன் ஸ்டாலின் திட்ட சிறப்பு முகாம் நடைபெறுகிறது. அதனைத் தொடர்ந்து, மாவட்ட ஆட்சியர் நாமக்கல் மாநகராட்சி பாப்பிநாயக்கன்பட்டியில் நடைபெற்ற உங்களுடன் ஸ்டாலின் திட்ட சிறப்பு முகாமினை பார்வையிட்டு, ஆய்வு மேற்கொண்டு உடனடி தீர்வாக பயனாளிகளுக்கு அரசு நலத்திட்ட உதவிகளை வழங்கினார். இந்நிகழ்வுகளில் கோட்ட பொறியாளர் திருகுணா, கொல்லிமலை வட்டாட்சியர் சந்திரா, வட்டார வளர்ச்சி அலுவலர்கள் ஈஸ்வரன் (கொல்லிமலை), சுந்தரம் (சேந்தமங்கலம்), ரெட் கிராஸ் ஒருங்கிணைப்பாளர் இராஜேஸ்கண்ணன், கல்லூரி பேராசிரியர்கள், துறை சார்ந்த அலுவலர்கள், உள்ளாட்சி பிரதிநிதிகள் உட்பட பலர் கலந்து கொண்டனர்.