திமுக அரசு பொய்யான முதலீட்டு வாக்குறுதிகள் கொடுக்கிறது -பொள்ளாச்சியில் எடப்பாடி பழனிசாமி பேச்சு !

பொள்ளாச்சி திருவள்ளுவர் திடலில் நடைபெற்ற தேர்தல் பிரசார கூட்டத்தில் நேற்று அ.தி.மு.க. பொதுச்செயலாளர் எடப்பாடி பழனிசாமி பேசினார். திமுக அரசு வெளிநாட்டு பயணங்களை தொழில் முதலீடுகளுக்காக அல்லாமல் தனிப்பட்ட நலனுக்காக பயன்படுத்துவதாகவும், 10 லட்சம் கோடி ரூபாய் முதலீடு, 37 லட்சம் வேலை வாய்ப்பு என கூறப்படும் தகவல்கள் பொய்யானவை என்றும் அவர் குற்றம்சாட்டினார். தமிழகத்தில் சட்டம்-ஒழுங்கு மோசமடைந்து, மூதாட்டிகள் மீது தாக்குதல், போதைப்பொருள் பரவல் அதிகரித்து வருவதாகவும் கூறினார். கூட்டங்களை கலைக்க திமுக ஆம்புலன்ஸ்களை பயன்படுத்துகிறது எனவும் அவர் விமர்சித்தார். ஆனைமலை-நல்லாறு, பாண்டியாறு-புன்னம்புழா ஆறு திட்டங்களை செயல்படுத்துவோம் என வாக்குறுதி அளித்தார். மக்கள் தான் ஆட்சியை அமைக்கவும் அகற்றவும் முடியும் என்பதை திமுக அறிந்துகொள்ள வேண்டும் என்றும் எச்சரித்தார். நிகழ்ச்சியில் முன்னாள் அமைச்சர்கள் எஸ்.பி.வேலுமணி, பொள்ளாச்சி ஜெயராமன் உள்ளிட்ட பலர் கலந்து கொண்டனர்.