சாலை மறியலில் ஈடுபட்ட 100 நாள் பணியாளர்கள்.

பரமத்திவேலூர், ஆக.31- நாமக்கல் மாவட்டம், பரமத்தி அருகே உள்ள கே.புதுப்பாளையத்தில் 100- நாள் பணியாளர்கள் திடீரென சாலை மறியலில் ஈடுபட்டதால் பரபரப்பு ஏற்பட்டது. இதன் காரணமாக நாமக்கல்லில் இருந்து பாலப்பட்டி சாலையில் சிறிது நேரம் போக்குவரத்து பாதிப்பு ஏற்பட்டது. மோகனூர் ஊராட்சி ஒன்றியம் மாடகாசம்பட்டி ஊராட்சியில் நேற்று 100 நாள் பணிக்கு நேற்று காலை பணியாளர்கள் வந்திருந்தனர். அப்போது அங்கு வந்த சுமார் 15 பேர்களை கே. புதுப்பாளையம் ஊராட்சிக்கு உட்பட்ட பகுதிக்கு செல்லமாறு கூறியதாக தெரிகிறது. இதற்கு எதிர்ப்பு தெரிவித்து சுமார் 15 பணியாளர்கள்  கே. புதுப்பாளையம் பகுதியில் நாமக்கல்லில் இருந்து பாலப்பட்டி செல்லும் சாலையில் திடீரென சாலை மறியலில் ஈடுபட்டதால் பரபரப்பு ஏற்பட்டது. தகவல் அறிந்து அங்கு வந்த பரமத்தி போலீசார் சாலை மறியலில் ஈடுபட்ட 100 நாள் பணியாளர்களிடம் பேச்சு வார்த்தை நடத்தி சமாதானம் செய்ததை தொடர்ந்து சாலை மறியலில் ஈடுபட்ட 100 நாள் பணியாளர்கள் அங்கிருந்து கலைந்து சென்றனர். இதனால் நாமக்கல்லில் இருந்து பாலப்பட்டி செல்லும் சாலையில் சிறிது நேரம் போக்குவரத்து பாதிப்பு ஏற்பட்டது.