மோட்டார் சைக்கிளில் 12 கிலோ சந்தன கட்டை கடத்தி வந்த வாலிபர் கைது

சேலம் மாவட்டம் காரிப்பட்டி அருகே உள்ள செல்லியம்பாளையம் பகுதியில் போலீசார் வாகன சோதனையில் ஈடுபட்டு கொண்டிருந்தனர். அப்போது அந்த வழியாக சந்தேகத்துக்கு இடமளிக்கும் வகையில் ஒரு மோட்டார் சைக்கிளில் 3 பேரும், அதைத்தொடர்ந்து மற்றொரு மோட்டார் சைக்கிளில் ஒருவரும் வந்தனர். போலீசாரை பார்த்ததும் அவர்கள் மோட்டார் சைக்கிள்களை அங்கேயே போட்டுவிட்டு தப்பி ஓடினர். இதையடுத்து போலீசார் அவர்களை விரட்டினர். இதில் ஒருவர் மட்டும் போலீசாரிடம் சிக்கினார். மற்றவர்கள் தப்பி ஓடிவிட்டனர். போலீசார் விசாரணையில், சிக்கியவர் பெரியகவுண்டாபுரம் பகுதியை சேர்ந்த விஜயகுமார் (வயது 27) என்பது தெரியவந்தது. மேலும் அவர் மோட்டார் சைக்கிளில் வைத்திருந்த சாக்கு மூட்டையில் 12 கிலோ சந்தன கட்டைகள் இருந்தது கண்டுபிடிக்கப்பட்டது. அவற்றை போலீசார் பறிமுதல் செய்து வனத்துறையினரிடம் ஒப்படைத்தனர். அதைத்தொடர்ந்து இந்த சந்தன கட்டைகள் எங்கிருந்து கடத்தி வரப்பட்டது?, தப்பி சென்றவர்கள் யார்? என்பது குறித்து விஜயகுமாரிடம் போலீசார் தொடர்ந்து விசாரித்து வருகின்றனர். மேலும் தப்பி சென்றவர்களை போலீசார் வலைவீசி தேடி வருகின்றனர்.