ஓடும் பஸ்சில் மூதாட்டியிடம் ரூ.15 ஆயிரம் ‘அபேஸ்’

சேலம் கந்தம்பட்டி பகுதியை சேர்ந்தவர் பாப்பாத்தி (வயது 65). இவர் பழைய பஸ் நிலையம் அருகே உள்ள ஒரு தனியார் நிறுவனத்தில் வேலை பார்த்து வருகிறார். மூதாட்டி நேற்று 4 ரோட்டில் இருந்து பழைய பஸ் நிலையத்திற்கு டவுன் பஸ்சில் வந்தார். கலெக்டர் அலுவலகம் அருகே வந்த போது அவரது பை பிளேடால் கிழிக்கப்பட்டு அதில் இருந்த ரூ.15 ஆயிரம் திருட்டு போனது தெரிந்து பதறினார். பின்னர் பஸ்சை விட்டு இறங்கி திருடனை கண்டுபிடித்து பணத்தை மீட்டுத்தர வலியுறுத்தி கலெக்டர் அலுவலகம் முன்பு அமர்ந்து கண்ணீர் விட்டு கதறி அழுதார். இதை பார்த்த அங்கிருந்த போலீசார் மூதாட்டியிடம் பேச்சுவார்த்தை நடத்தினர். இது குறித்து டவுன் போலீசார் வழக்குப்பதிவு செய்து திருடனை தேடி வருகின்றனர். இதனால் கலெக்டர் அலுவலகத்தில் சிறிது நேரம் பரபரப்பு ஏற்பட்டது.