டவுன் பஸ் மீது ஆம்புலன்ஸ் மோதல் பயணிகள் உட்பட 3 பேர் காயம்!

விராலிமலை:திருச்சி மத்திய பஸ் நிலையத்தில் இருந்து விராலிமலைக்கு நேற்று மாலை அரசு டவுன் பஸ் புறப்பட்டு வந்தது. திருச்சி - மதுரை தேசிய நெடுஞ்சாலையில் கொண்டமநாயக்கன்பட்டி அருகே விராலிமலை பிரிவு சாலையில் டவுன் பஸ் திரும்பியபோது, மதுரையில் இருந்து திருச்சி நோக்கி சென்ற ஆம்புலன்ஸ் எதிர்பாராதவிதமாக பஸ் மீது மோதியது. இதில் பஸ்சில் பயணம் செய்த திருச்சி மாவட்டம் மருங்காபுரி தாலுகா வடவேளாம்பட்டியை சேர்ந்த லட்சுமணன் (50), தாதனுாரை சேர்ந்த அய்யப்பன் (38), ஆம்புலன்ஸ் டிரைவர் விழுப்புரம் மாவட்டத்தை சேர்ந்த குணா (30) ஆகிய 3 பேரும் காயமடைந்தனர். உடனடியாக அவர்கள் சிகிச்சைக்காக மணப்பாறை அரசு மருத்துவமனைக்கு அனுப்பி வைக்கப்பட்டனர். இதுகுறித்து விராலிமலை போலீசார் வழக்குப்பதிந்து விசாரணை நடத்தி வருகின்றனர்.