ஊத்தங்கரை அருகே கார் பிக்கப் வேன் மோதல் 3 பேர் பலி 4 பேர் படுகாயம்...

ஊத்தங்கரை அருகே கார் பிக்கப் வேன் மோதல் 3 பேர் பலி 4 பேர் படுகாயம்... நிச்சயதார்த்த விழாவிற்கு சென்றபோது விபத்து... கிருஷ்ணகிரி மாவட்டம் ஊத்தங்கரை அடுத்த சிங்காரப்பேட்டை அருகே கார் மற்றும் பிக்கப் வேன் மோதியதில் 3 பேர் பலியானார்கள். 4 பேர் படுகாயம் அடைந்தனர். கர்நாடக மாநிலம் பெங்களூர் ராஜாஜி நகரிலிருந்து திருவண்ணாமலை மாவட்டம் போளூர் அருகே உள்ள தேவிகாபுரத்தில் நடைபெறும் உறவினரின் நிச்சயதார்த்த நிகழ்ச்சியில் பங்கேற்பதற்காக ஒன்றரை வயது கை குழந்தையுடன் 9 பேர் காரில் திருவண்ணாமலை நோக்கி சென்றனர். கிருஷ்ணகிரி மாவட்டம் ஊத்தங்கரையை அடுத்த சிங்காரப்பேட்டை அருகே தேசிய நெடுஞ்சாலையில் வரும் போது காரும் எதிரே வந்த பிக்கப் வேனும் நேருக்கு நேர் மோதியதில் சம்பவ இடத்திலேயே 3 பேர் பலியானார்கள். இந்த விபத்தில் 4 பேர் படுகாயம் அடைந்தனர். படுகாயம் அடைந்தவர்களை மீட்டு சிகிச்சைக்காக ஊத்தங்கரை அரசு மருத்துவமனையில் அனுமதிக்கப்பட்டு மேல் சிகிச்சைக்காக கிருஷ்ணகிரி அரசு மருத்துவமனைக்கு அனுப்பி வைத்தனர். இந்த விபத்தில் பெங்களூரு ராஜாஜி நகரை சேர்ந்த சக்கரவர்த்தி மகன் சீனிவாசன் வயது 23 அதே பகுதியை சேர்ந்த வேலாயுதம் மகள் ஷாம்லி வயது 25 மற்றும் பாப்பாத்தி வயது 54 ஆகிய மூவரும் சம்பவ இடத்திலேயே பலியானார்கள். விபத்தில் பெங்களூர் ராஜாஜி நகர் சேர்ந்த ராஜேந்திரன் மனைவி பூர்ணிமா வயது 38 சக்கரவர்த்தி மகள் நதியா வயது 29 ஜெயக்குமார் மனைவி காந்தா வயது 47 சக்கரவர்த்தி மகள் ரேவதி வயது 34 ஆகிய நால்வரும் படுகாயம் அடைந்தனர். விபத்தில் அதிர்ஷ்டவசமாக கைகுழந்தைக்கு காயம் ஏதும் ஏற்படவில்லை. விபத்து குறித்து சிங்காரப்பேட்டை போலீசார் வழக்கு பதிவு செய்து விசாரணை மேற்கொண்டு வருகிறார்கள். விபத்தில் இறந்தவர்களின் உடல்கள் மீட்கப்பட்டு பிரேத பரிசோதனைக்காக ஊத்தங்கரை அரசு மருத்துவமனைக்கு அனுப்பி வைத்தனர். பட்ட பகலில் நடந்த இந்த விபத்து அந்த பகுதியில் பெரும் பரபரப்பை ஏற்படுத்தியது. இந்த விபத்தில் பிக்கப் வேன் டிரைவர் தப்பி ஓடினார்.