சேலம் வடக்கு தொகுதியில் ரூ.1 கோடியில் புதிய திட்டப்பணிகள்

சேலம் வடக்கு சட்டமன்ற தொகுதிக்கு உட்பட்ட பல்வேறு இடங்களில் நேற்று புதிய திட்டப்பணிகள் தொடங்கப்பட்டது.

முதலில், மாநகராட்சி 7-வது வார்டில் ஆத்துக்காடு பகுதியில் ரூ.30 லட்சம் மதிப்பில் கழிவுநீர் கால்வாய் மற்றும் கான்கிரீட் சாலை அமைக்கும் பணியை மத்திய மாவட்ட தி.மு.க. செயலாளர் ராஜேந்திரன் எம்.எல்.ஏ. தொடங்கி வைத்தார்.

தொடர்ந்து 8-வது வார்டில் மாரியம்மன் கோவில் பகுதியில் பேவர் பிளாக் சாலை அமைத்தல், 12-வது வார்டில் ராஜகணபதி நகரில் கலைஞர் கால்வாய் அமைத்தல், 16-வது வார்டில் வாசகர் சாலை பகுதியில் கழிவுநீர் கால்வாய் அமைத்தல், 10-வது வார்டில் ஸ்ரீராம் நகரில் கழிவுநீர் வாய்க்கால் அமைத்தல், 9-வது வார்டு மாநகராட்சி உயர்நிலைப்பள்ளிக்கு சுமார் ரூ.6 லட்சம் மதிப்பீட்டில் சுற்றுச்சுவர் அமைப்பதற்கான பணியையும் எம்.எல்.ஏ. தொடங்கி வைத்தார். நேற்று ஒரேநாளில் 7 இடங்களில் நடந்த நிகழ்ச்சியில் ரூ.1 கோடி மதிப்பிலான பல்வேறு திட்டப்பணிகளை வக்கீல் ராஜேந்திரன் எம்.எல்.ஏ. தொடங்கி வைத்தார். முன்னதாக வடக்கு சட்டமன்ற தொகுதிக்கு உட்பட்ட பகுதிகளில் குறைகளை கேட்டறிந்து அவற்றை நிறைவேற்ற உரிய நடவடிக்கை எடுப்பதாகவும் உறுதியளித்தார்.