குமரியில் பத்தாம் வகுப்பு பொது தேர்வு ஹால் டிக்கெட் விநியோகம்

கன்னியாகுமரி மாவட்டத்தில் பத்தாம் வகுப்பு பொது தேர்வு வரும் மார்ச் 26 ஆம் தேதி தொடங்கி ஏப்ரல் 8-ம் தேதி வரை நடைபெற உள்ளது. பத்தாம் வகுப்பு பொது தேர்வு எழுதுகின்ற மாணவ மாணவியர்களுக்கு செய்முறை தேர்வுகள் கடந்த பிப்ரவரி 23-ம் தேதி தொடங்கி 29ஆம் தேதி வரை பள்ளிகளால் நடத்தி முடிக்கப்பட்டுள்ளது. பத்தாம் வகுப்பு பொது தேர்வு முடிவுகள் மே மாதம் பத்தாம் தேதி என்று அறிவிக்கப்பட்டுள்ளது.பொதுத்தேர்வு எழுதும் மாணவர்களுக்கு ஹால் டிக்கெட் மார்ச் 15ஆம் தேதியும், தேர்வு மையப் படிவங்களை 16ஆம் தேதி பதிவிறக்கம் செய்து கொள்ளலாம் என்று தேர்வுத்துறை இயக்குனரகம் அறிவித்திருந்தது. பின்னர் அது மார்ச் 20ஆம் தேதிக்கு மாற்றப்பட்டது. அந்த வகையில் மாணவர்களுக்கு ஹால்டிக்கெட் மற்றும் தேர்வு மையப் படிவங்கள் நேற்று முன்தினம் பிற்பகல் பதிவிறக்கம் செய்யப்பட்டு, அவற்றை சரிபார்க்கப்பட்டு மாணவர்களுக்கு நேற்று வழங்கப்பட்டது. நாகர்கோவில் எஸ்எல்பி அரசு மேல்நிலைப் பள்ளியில் தலைமை ஆசிரியர் ஜமீனா மாணவர்களுக்கு ஹால் டிக்கெட்கள் வழங்கி பொதுத் தேர்வுகள் எழுத உள்ள மாணவர்களுக்கு அறிவுரைகளையும் வழங்கினார். இதனை போன்று மாவட்டத்தில் உள்ள அனைத்து பள்ளிகளில் நேற்று மாணவ மாணவிகளுக்கு ஹால் டிக்கெட் வழங்கப்பட்டது.