தந்தை, மகனை கட்டையால் தாக்கிய 2 பேர் கைது

சேலம் தாதகாப்பட்டி செல்லக்குட்டிக்காடு எட்டி முனியப்பன் கோவில் தெருவைச் சேர்ந்தவர் உத்தமன் (வயது 47), கூலித் தொழிலாளி. இவருக்கும், அதே பகுதியைச் சேர்ந்த சிலருக்கும் ஒரு பிரச்சினை தொடர்பாக முன் விரோதம் இருந்து வந்ததாக கூறப்படுகிறது. இந்த நிலையில் உத்தமன் நேற்று முன்தினம் தனது மகன் கிரிபாபுவுடன் வீட்டில் பேசிக் கொண்டிருந்தார். அப்போது அங்கு வந்த அந்த நபர்களுக்கும், உத்தமன் தரப்பினருக்கும் பிரச்சினை தொடர்பாக மீண்டும் வாக்குவாதம், தகராறு ஏற்பட்டது. தொடர்ந்து ஆத்திரமடைந்த அந்த நபர்கள் உத்தமன், கிரிபாபுவை அங்கிருந்த கட்டைகளால் தாக்கியதாக கூறப்படுகிறது. இதில் காயமடைந்த இருவரும் சேலம் அரசு ஆஸ்பத்திரியில் சேர்க்கப்பட்டு சிகிச்சை பெற்று வருகின்றனர். இது குறித்து அவர்கள் அளித்த புகாரின் பேரில் அன்னதானப்பட்டி போலீசார் வழக்குப்பதிவு செய்து மூணாங்கரடு பகுதியை சேர்ந்த பகத்சிங் நகரைச் சேர்ந்த சதீஷ் குமார் (20), குமரேசன் (22) ஆகிய 2 பேரை கைது செய்தனர்.