வழிப்பறியில் ஈடுபட்ட சிறுவன் உட்பட 3 பேர் கைது  !

கன்னியாகுமரி மாவட்டம் நாகர்கோவில் அப்பா மார்க்கெட் பகுதியில் இருந்து புத்தேரி செல்லும் நான்கு வழி சாலை உள்ளது. இந்த சாலை இன்னும் முழுமையாக பயன்பாட்டிற்கு வரவில்லை. இந்த சாலையில் காலை மாலை நேரங்களில் ஏராளமான பொதுமக்கள் நடை பயிற்சி மேற்கொண்டு வருவது வழக்கம்.

கடந்த இரண்டு நாட்களுக்கு முன்பு அந்த பகுதியில் நடை பயிற்சி செய்த பூதப்பாண்டி தெற்கு தெருவை சேர்ந்த சீனிவாசன் (34) என்பவரிடம் இருந்து மோட்டார் சைக்கிள் வந்த மர்ம நபர்கள் செல்போனை பறித்து சென்றனர்.இது குறித்த அவர் வடசேரி போலீசில் புகார் செய்தார்.

இதை அடுத்து அதே நேரத்தில் அங்கு நடை பயிற்சி மேற்கொண்ட சங்கரராமன் (63) என்பவரின் செல்போனையும், பின்னர் வடசேரி பகுதியை சேர்ந்த ஆறுமுகம் (63) என்பவரிடமிருந்தும் செல்போனை மர்ம நபர்கள் பறித்து சென்றனர்.

இது தொடர்பாக வடசேரி போலீஸ் நிலையத்தில் புகார் செய்யப்பட்டது. இது தொடர்பாக நடத்திய விசாரணையில் நம்பர் பிளேட் இல்லாத இருசக்கர வாகனத்தில் வந்து செல்போன் பார்த்து சென்றிருப்பது தெரிய வந்தது. மேலும் அந்த பகுதியில் உள்ள சிசிடிவி கேமரா காட்சிகளை போலீசார் ஆய்வு செய்து விசாரித்து வந்தனர்.

இந்த நிலையில் தனிப்படை போலீசார் இது தொடர்பாக ஆசாரிபள்ளம் வடக்கு தெருவை சேர்ந்த பிரவீன் (23) ராஜாக்கமங்கலத்துறை 17 வயது சிறுவன் ஒருவர், மேலராமன்புதூரை சேர்ந்த நவீன் (19)ஆகிய வரை போலீசார் கைது செய்தனர்.

கைது செய்யப்பட்ட மூன்று பேர் கோர்ட்டில் ஆஜர் படுத்தி சிறையில் அடைத்தனர். இவர்கள் மீது ஏற்கனவே ஒவ்வொருவருக்கும் 10க்கும் மேற்பட்ட திருட்டு வழக்குகள் உள்ளதாக போலீசார் தெரிவித்தனர்.