4 சிறுவர்கள் தப்பி ஓடிய சம்பவம்: காப்பகத்தில் 20 பேர் இடமாற்றம்
திருச்சியில் குழந்தைகள் காப்பகத்தில் இருந்த 4 சிறுவர்கள் தப்பி ஓட்டம் ஓடிய சம்பவத்தில், அங்கிருந்த 20 பேர் இடமாற்றம் செய்யப்பட்டுள்ளனர்.
இது குறித்து காப்பகத்தின் பொறுப்பாளர் ராஜேஷ், கோட்டை போலீசில் புகார் செய்தார். அதன் பேரில் போலீசார் வழக்கு பதிவு செய்து தப்பி ஓடிய 4 சிறுவர்களையும் தேடி வருகின்றனர். ஆனால் ஒரு வாரத்துக்கு மேலாகியும் தப்பி ஓடிய சிறுவர்கள் குறித்த துப்பு கிடைக்கவில்லை. அதைத்தொடர்ந்து திருச்சி மாவட்ட ஆட்சியர் பிரதீப் குமார் அந்தக் காப்பக நிர்வாகத்திற்கு நோட்டீஸ் அனுப்பி சிறுவர்கள் தப்பி ஓடியது குறித்து விளக்கம் கேட்டார். பின்னர் அந்த காப்பகத்தில் தங்க வைக்கப்பட்டிருந்த 20 குழந்தைகளை வேறு காப்பகங்களுக்கு மாற்றுவதற்கு உத்தரவிட்டார்.
அதன்படி குழந்தைகள் நலக்குழு அதிகாரிகள் 20 குழந்தைகளை வேறு சில மாவட்டங்களில் செயல்படும் காப்பகங்களுக்கு அனுப்பி வைத்தனர். மறு உத்தரவு வரும் வரை அந்த சிறுவர்கள் தற்போது மாற்றப்பட்டுள்ள காப்பகங்களில் தங்க வைக்கப்படுவார்கள் என ஆட்சியர் தரப்பில் தெரிவிக்கப்பட்டுள்ளது.
