மோட்டார் சைக்கிள் திருட்டு - சிறுவர்கள் உட்பட 4 பேர் கைது

சேலம் ஜாகீர்அம்மாபாளையம் ஜீவாநகர் பகுதியை சேர்ந்தவர் சம்பத்குமார் (வயது 37). இவர், சேலத்தில் உள்ள ஒரு பிரபல ஓட்டலில் வேலை செய்து வருகிறார். வீட்டின் முன் தனது மோட்டார் சைக்கிளை நிறுத்தியிருந்தார். மறுநாள் காலையில் எழுந்து பார்த்தபோது அவரது மோட்டார் சைக்கிளை காணவில்லை. இதனால் அதிர்ச்சி அடைந்த சம்பத்குமார், இதுபற்றி சூரமங்கலம் போலீசில் புகார் செய்தார். அதன்பேரில் போலீசார் விசாரணை நடத்தினர்.

அதில், கிச்சிப்பாளையம் களரம்பட்டி காளிகவுண்டர்காடு பகுதியை சேர்ந்த சதீஷ்குமார் என்ற சுரேஷ் (22), அவருடன் 17 வயதுடைய 3 சிறுவர்களும் சேர்ந்து மோட்டார் சைக்கிள் திருட்டில் ஈடுபட்டது தெரியவந்தது. இதுகுறித்து போலீசார் வழக்குப்பதிவு செய்து சதீஷ்குமார் உள்பட 4 பேரையும் கைது செய்தனர். அவர்களிடம் இருந்து திருடப்பட்ட மோட்டார் சைக்கிள் பறிமுதல் செய்யப்பட்டது. கைதான சதீஷ்குமாரை மத்திய சிறையிலும், 3 சிறுவர்களை சிறுவர் சீர்திருத்த மையத்திலும் அடைக்கப்பட்டனர். இவர்களில் சதீஷ்குமார் மீது ஏற்கனவே 7 வழக்குகள் நிலுவையில் உள்ளது என்பது குறிப்பிடத்தக்கது.