சேலத்தில் விவசாயி கொலை வழக்கில் மேலும் 5 பேர் கைது !

சேலம் வீராணம் அருகே உள்ள பள்ளிப்பட்டி ஏரிக்கரை பகுதியை சேர்ந்தவர் சம்பு என்கிற சண்முகம் (வயது 50), விவசாயி. இவருக்கு அந்த பகுதியில் விவசாய நிலம் உள்ளது. இவர் அதே பகுதியை சேர்ந்த வேறு ஒருவரிடம் ரூ.1 லட்சம் கடன் வாங்கி இருந்ததாக தெரிகிறது. பணம் கொடுக்கல், வாங்கலில் இவர்களுக்கு இடையே முன்விரோதம் இருந்து வந்து உள்ளது. மேலும் சண்முகத்திற்கும், வேறு ஒருவருக்கும் நிலத்தகராறும் இருந்து உள்ளது. கடந்த 2 நாட்களுக்கு முன்பு சண்முகம் ஏரிக்காடு பகுதியில் உள்ள விவசாய கிணற்றில் தூர்வாரும் பணியில் ஈடுபட்டிருந்த போது கும்பல் ஒன்று அவரை அடித்து கொலை செய்து விட்டு தப்பி ஓடியது. இந்த சம்பவம் குறித்து வீராணம் போலீசார் வழக்குப்பதிவு செய்து விசாரணை நடத்தி வருகின்றனர். இந்த கொலை தொடர்பாக கட்டையன், சதீஷ்குமார் ஆகியோரை போலீசார் ஏற்கனவே கைது செய்தனர். மேலும் இந்த கொலையில் தொடர்புடையதாக கருதப்படும், பள்ளிப்பட்டியை சேர்ந்த சண்முகம் (33), கார்த்திக் ராஜா (26), கிரி பாலாஜி (23), அரிச்சந்திரபாபு (23), வடிவேல் (28) என 5 பேரை போலீசார் கைது செய்து விசாரணை நடத்தி வருகின்றனர். இந்த கொலை வழக்கு தொடர்பாக மேலும் சிலரை போலீசார் தேடி வருகின்றனர்.