பனமரத்துப்பட்டியில் முன்விரோதத்தில் வாலிபரை தாக்கிய 5 பேர் கைது

சேலம் அருகே உள்ள பனமரத்துப்பட்டி மாரியம்மன் கோவில் தெருவை சேர்ந்தவர் தினேஷ் (வயது 28). கூலித்தொழிலாளி. இவருக்கும், பனமரத்துப்பட்டி பகுதியை சேர்ந்த சில வாலிபர்களுக்கும் முன்விரோதம் இருந்து வந்ததாக கூறப்படுகிறது.

சம்பவத்தன்று இரவு தினேஷ் தனது உறவினருடன் மாரியம்மன் கோவிலுக்கு சென்றார். அப்போது அங்கு வந்த பனமரத்துப்பட்டி காந்திநகரை சேர்ந்த பெருமாள், கிஷோர், குப்புராஜ், சபரிராஜ் ஆகிய 6 பேர் தினேசிடம் தகராறு செய்து தாக்கினர். இதில் பலத்த காயமடைந்த தினேசை அக்கம் பக்கத்தினர் மீட்டு சேலம் அரசு மருத்துவமனையில் சேர்த்தனர்.

இதுகுறித்த புகாரின்பேரில் பனமரத்துப்பட்டி போலீசார் விசாரணை நடத்தி தினேசை தாக்கிய பெருமாள் (23), சபரிராஜ் (20), ஜெயக்குமார் (20), குப்புராஜ் (25) மற்றும் அதே பகுதியை சேர்ந்த 17 வயது சிறுவன் என 5 பேரை போலீசார் கைது செய்தனர். பின்னர் அவர்களை சேலம் கோர்ட்டில் ஆஜர்படுத்தி மத்திய சிறையிலும், சிறுவனை சிறுவர் சீர்த்திருத்த பள்ளியிலும் அடைத்தனர். தலைமறைவான கிஷோர் என்ற வாலிபரை தேடி வருகின்றனர்.